Páter ýáde etip, keıin aqsha surady — «Elge kómek» qory boıynsha jábirlenýshi
ALMATY. KAZINFORM — Almaty qalasynyń Almaly aýdandyq sotynda asa iri kólemdegi alaıaqtyq isi boıynsha Іlııas Sárıev pen Aqtoty Dúıseevaǵa qatysty sot otyrysy ótti.
Sotta jábirlenýshi Gúlbahor Túreeva sóz sóıledi. Ol otbasynda baspana joq ekenin jáne óziniń qamqorlyǵynda múgedektigi bar 5 adam — kúıeýi, qyzy jáne úsh nemeresi bar ekenin aıtty.
— Men jumysta júrgenimde olar úıimizge kelip, otbasymyzdy jáne ómir súrip jatqan jaǵdaıymyzdy vıdeoǵa túsirip, bizge páter alyp berýge ýáde etti. Men eshteńe qajet emes ekenin aıttym, biraq Іlııas báribir kómektesemin dep sendirdi. Birneshe kúnnen keıin kafege shaqyryp, bizge úı satyp alǵanyn aıtty. Alaıda páterdi óz kózimizben kórmedik, tek páterdiń «Kókjıek» yqsham aýdanynda ornalasqanyn aıtty. Jınalǵan aqsha Sárıev pen Dúıseevanyń esepshottaryna túsken, — dedi jábirlenýshi.
Onyń aıtýynsha, páterdi olardyń atyna rásimdeý úshin aıyptalýshylar qosymsha aqsha talap etken.
— Qujattardy rásimdeý úshin menen 200 myń teńge surady, keıin jol shyǵynyna, tamaǵyna jáne basqa da shyǵyndarǵa birneshe ret aqsha aldy. Bul aqshalardyń bárin ózim berdim, — dedi jábirlenýshi.
Jalpy Túreevaǵa 800 myń teńge kóleminde zalal keltirilgen. Qorǵaý tarapynyń aıtýynsha, Sárıev baspanasyz áıelge jalǵa páter alý úshin 300 myń teńge bergen. Alaıda ol jerde bul otbasy tek bir apta ǵana turǵan. Sebebi páter ıesi múgedektigi bar balalardyń mazasyz minez-qulqyn aıtyp, shyǵaryp jibergen.
Jábirlenýshi sózinen keıin sýdıa Ernar Qasymbekov úzilis jarııalap, sot otyrysyn 2025 jyldyń 4 qyrkúıegine deıin shegerdi.
Іs boıynsha 26 adam jábirlenýshiler retinde tanyldy, onyń ishinde 12 adamnyń múddesin advokattar qorǵap otyr.
— Áriptesimmen birge 12 jábirlenýshiniń múddesin qorǵap otyrmyz. Qylmystyq is sottalýshylarǵa qatysty júrgizilip jatyr. Olar aldaý jáne senimdi teris pıǵylda paıdalaný arqyly jábirlenýshilerdiń aqshalaı qarajatyn ıemdengen. Áleýmettik jeliler arqyly adamdardy Mekkege qajylyqqa aparamyz dep aldap, sondaı-aq múgedektigi bar adamdarǵa páter alyp beremiz dep aqsha jınaǵan, — dedi advokat Asylbek Abdraıymov sot otyrysynan keıin agenttikke bergen suhbatynda.
Jábirlenýshi taraptyń qorǵaýshylary keltirilgen zalal somasy 25 mln teńge bolǵanyn atap ótti.
Buǵan deıin sotta memlekettik aıyptaýshy qylmystyq is boıynsha aıyptaý aktisin oqydy.
Al Іlııas Sárıev sotta kinásin ishinara moıyndady.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.