Páter tonaýshylardan qalaı qorǵanýǵa bolady
ALMATY. QazAqparat - Almaty polıtsııasy páter tonaýshylardan qorǵaný joldaryn aıtty, dep habarlaıdy QazAqparat tilshisi.
Qalada páterge túsetin qylmyskerler óte kóp. Kóp jaǵdaıda oǵan azamattardyń qamsyzdyǵy da muryndyq bolady eken.
«Qylmyskerler áleýmettik jeliden kóp aqparat alady. Facebook nemese Instagram jelisine 10 kúnge kýrortqa ketkenińizdi jazsańyz, páter bos ekeni bárine belgili bolyp qalady. Úı ıesiniń sýretteri men aqparattaryn aqtaryp otyryp qylmyskerler onyń mekenjaıyn op-ońaı anyqtap alady»,- dedi ІІD resmı ókili Saltanat Ázirbek.
Onyń aıtýynsha, kóbine urylar jaz mezgilin utymdy paıdalanady.
«Qalanyń shekarasy ashyq. Kóbine qylmys jasaıtyn adamdar shetten keledi. Almaty oblysynan kelgender jerlesteriniń úıinde bir topqa birigip alady. Al Shyǵys Qazaqstannan kelgen qylmystyq top birazǵa deıin osal tusyn bermeı júrdi. Olar biraz kúnge kelip, birneshe páterdi "tazalap", Shyǵys Qazaqstanǵa ketip qalatyn. Biraz ýaqyt ótip, tynyshtanǵan soń qaıta kelip ońaı oljaǵa kirisetin», - dedi Saltanat Ázirbek.
Qalalyq polıtsııa urylardan qorǵaný maqsatynda birneshe tásil usyndy.
«Eń aldymen aýlada beınekamera bolýy tıis. Jekemenshik kúzet kompanııasymen baılanysta bolý kerek. Sonymen qatar, beıtanys adamdarǵa óziniń jospary týraly aıta berýge bolmaıdy», - dedi ol.
