Páter tonaýmen ustalǵan kúdiktige taǵy da 11 qylmysqa qatysy bar degen aıyp taǵyldy
ALMATY. 24 tamyz. QazAqparat /Ádilet Musahaev/ - 35 jasar aqtóbelik ákki urynyń osy ýaqytqa deıin jasaǵan qylmystaryna tájirıbeli tártip saqshylarynyń ózderi de tań qalyp otyr, dep habarlaıdy Almaty qalasy ІІD baspasóz ortalyǵy.
Dene bitimi fızıkalyq turǵydan jaqsy damyǵan ol, qylmys jasaýǵa tyńǵylyqty daıyndalyp shyqqan kórinedi. Tipti, qolaısyz jaǵdaılar týyndaǵan jaǵdaılarda qalaı iz jasyrý kerektigin, naqty josparlar arqyly iske asyrǵan. Ol óziniń ár qadamyn ańdap basyp, asa saqtyqpen qımyldaǵan.
«Biz qalamyzdyń jatyn aýdandarynda oryn alǵan bir saryndy qylmystardy tek bir adam jasap júrgendigin birden ańǵarǵan bolatynbyz. Ákki ury tek qana ekinshi qabatta ornalasqan páterlerdi tonaýmen ǵana aınalysqan. Páter terezelerinen ishke ońaı engen qylmysker, saýsaq izderin qaldyrmas úshin qolǵap kıip alyp iske kirisken. Áp sátte altyn buıymdar men áıelderdiń qymbat tondaryn jymqyrǵan ol, eshqandaı qymsynbastan esik arqyly, kórshiler kózine shalynbaı-aq dálizben dalaǵa shyǵyp kete bergen»,-dep atap kórsetti Almaty qalasy ІІD-niń Krımınaldyq polıtsııa basqarmasynyń, múliktik qylmysqa qarsy kúres bóliminiń bastyǵy, polıtsııa podpolkovnıgi Arsen Baımuhanbetov.
Tártip saqshylarynyń nazaryna ilikpes úshin ol, jymqyryp alǵan ońaı oljalaryn Almaty qalasynda saýdalamaǵan. Qalamyzda nebári bir aı ǵana turaqtaǵan ury, kezekti qylmystaryn jasaǵannan keıin óz aımaǵyna ketip qalyp otyrǵan. Jaz mezgili mundaı kásippen aınalysatyndar úshin óte qolaıly bolǵandyqtan, baýkespe ury úıde teledıdar qarap jatýdy jón sanamaǵan kórinedi. Bir qyzyǵy ol shaharymyzdaǵy qymbat qonaqúılerdi ǵana meken etken.
«Biz kúdiktini uzaq izdestirý is-sharalarynan keıin ǵana qolǵa túsirdik. Ol qalamyzdaǵy móltek aýdandardyń birinde kezekti páter tonaý kezinde quryqtaldy. Qymbat noýtbýk pen sandyq fotoapparat, jáne de iri kólemde aqsha jymqyryp úlgergen ol, keshkilik ushaqqa bılet alyp, sol kúni Aqtóbege ushyp ketýdi josparlap qoıǵan. Kámelettik jasqa tolmaǵan eki balanyń ákesi budan buryn da urlyq jasaǵany úshin qylmystyq jaýapkershilikke tartylǵan. Tergeý amaldary jalǵasýda»,-dep málimdedi A.Baımuhanbetov.
