Páter tek kezekpen beriledi: Nurlan Noǵaev turǵyndardy qabyldaýda

ATYRAÝ. QazAqparat - Atyraý oblysynyń ákimi Nurlan Noǵaevtyń qabyldaýyna júzge jýyq turǵyn jazyldy, dep habarlaıdy QazAqparat tilshisi.

Búgin, 21 qarashada Memleket basshysynyń tapsyrmasy boıynsha Qazaqstanda memlekettik organdar arasynda azamattardy qabyldaýdyń biryńǵaı kúni ótip jatyr. Aımaq basshysynan keńes alýǵa 160-tan astam turǵyn jazylǵan. Túske deıin jurtshylyq tarapynan túsken saýaldardyń basym bóligi turǵyn úı, jer kezegin alýǵa jeńildik, jumysqa ornalasý týraly boldy. Halyqtyń áleýmettik osal tobyn áleýmettik qoldaý sharalary týraly da suraqtar qoıyldy. Nurlan Noǵaev azamattardyń saýaldaryna jaýap berip, turǵyndarǵa kómek zań aıasynda ǵana beriletinin atap ótti. «Memleket qaıyrymdylyq qory emes, turǵyn úıdi ońdy-soldy kezeksiz bere almaımyz, bizden de suraý bolady, páter berý úshin negiz kerek. Qazir Atyraýdyń ózinde 13 sanat boıynsha 20 myńnan astam adam páter kezeginde tur. Turǵyn úı tek qana kezekpen beriledi», - dep naqtylady Nurlan Noǵaev. Azamattardy jeke qabyldaý barysynda keler jyldan bastap kolledj túlekterine Atyraý oblysynyń joǵary oqý oryndaryna túsýge óńirlik grant alý múmkindigi bolatyny týraly da aıtyldy.