Páter satylǵannan keıin TKSh-ny jańǵyrtýdan qalǵan qaryzdy kim tóleıdi
ASTANA. QazAqparat - Ekibastuz qalasynda Turǵyn úı kommýnaldyq sharýshylyǵyn jańǵyrtý baǵdarlamasy aıasynda kóppáterli úı kúrdeli jóndeýden ótken bolatyn. Bir páterdiń ıesi óz úıin qaryzymen birge satyp jiberdi. Alaıda úıdiń jańa ıesi kúrdeli jóndeýdiń bereshegin tóleýden bas tartty, dep habarlaıdy QazAqparat tilshisi.
Ekibastuz qalalyq soty taratqan aqparatqa sáıkes, jóndeý jumystaryn jasaǵan jekemenshik kompanııa burynǵy ıesin sotqa berip, qaryzdy tólep berýdi talap etti.
L. esimdi kelinshek páterin satqanda turǵyn úı kommýnaldyq sharýshylyǵyn jańǵyrtýdan qalǵan qaryzy jaıynda aıtqanyn jetkizdi. Onyń sózine qaraǵanda, páterdiń jańa ıesi eki aılyq aqshany tóledi. Demek, qaryzdy óz moınyna aldy.
Biraq A. esimdi azamat páterdi óz atyna aýdarǵanda kommýnaldyq tólemder úshin bereshektiń bolmaǵanyn aıtty. Burynǵy ıesi kúrdeli jóndeýdiń qaryzy bar ekenin eskertpegen. Al eki aıdyń aqshasyn tólegende ol naqty ne úshin aqsha aýdarǵanyn ózi de durys túsinbepti. Artynan ol qaryzdy múldem tólemeı qoıdy.
«Turǵyn úı kommýnaldyq sharýshylyǵyn jańǵyrtý týraly kelisimsharttary men Azamattyq kodekstiń 346 men 347-baptaryna sáıkes, páterdiń ıesi úıdi satqanda jańǵyrtýdan qalǵan qaryzdy basqa adamǵa aýdarý týraly kelisimdi jasaýy tıis. Atalǵan qujat rásimdelmese, páterdiń jańa ıesi bereshekti tóleý mindetinen bosatylady. Osyǵan baılanysty jekemenshik kompanııanyń shaǵymy jartylaı qanaǵattandyryldy. Páterdiń burynǵy ıesi TKSh-ny jańǵyrtý aıasynda kúrdeli jóndeý jumystary úshin 119 455 teńge tólep berýi tıis», - delingen sottyń resmı habarlamasynda.
