Páter satýshyny óltirgen úsh jezqazǵandyqqa úkim shyqty
QARAǴANDY. QazAqparat - Qaraǵandyda 58 jastaǵy er adamdy myltyqpen atyp óltirip, úıin tonap ketken úsh jezqazǵandyqqa sot úkimi shyqty, dep habarlaıdy QazAqparat tilshisi.
«Sýdıa eki sottalýshyny Qylmystyq kodekstiń birneshe baby, sonyń ishinde adam (jábirlenýshini) óltirý boıynsha aıypty dep tanyp, 21 jylǵa bas bostandyǵynan aıyrdy. Olar qaýipsizdigi barynsha kúsheıtilgen mekemede jazasyn óteıdi. Úshinshi sottalýshyny qylmysty jasyrdy, jábirlenýshiniń múlikterin tonaýǵa qatysty dep tanyp, oǵan alty jyl merzimge bas bostandyǵynan aıyrý jazasy belgilendi. Ol qaýipsizdik deńgeıi ortasha mekemede jazasyn óteıtin bolady. Úkim zańdy kúshine engen joq», - deıdi Qaraǵandy mamandandyrylǵan aýdanaralyq sotynyń ókilderi.
Budan tys, moraldyq zalaldyń quny retinde qylmystyq istiń negizgi fıgýranttarynyń árqaısynan 1,5 mıllıon teńge ótemaqy óndirý týraly sheshim shyǵaryldy. Sondaı-aq jábirlenýshiniń uly Erqanat Shákirov buryn materıaldyq zalal úshin 6 mıllıon 644 myń teńge mólsherinde ótemaqy talap etken bolatyn. Sot materıaldyq zalaldyń ótemaqysy retinde 2 mıllıon 453 mıllıon teńge óndirý týraly sheshim shyǵardy.
Eske sala keteıik, belgisiz sebepterge oraı adam óltirý deregi týraly byltyr mamyr aıynyń basynda habar taraǵan edi. Jábirlenýshini izdeýge 8 aı ýaqyt ketti. Erkin Shákirovti aldymen atyp óltirip, denesin órtemek bolǵan. Shákirovti óltirýdegi maqsat páterdi satqannan túsken qarjyny urlaý bolǵan. Jábirlenýshini qatygezdikpen óltirgender onyń páteriniń kiltin alyp, baǵaly zattaryn urlap ketken. Qylmys segiz aı ýaqyt ótken soń ǵana ashyldy.
Foto: yakutsk.news
