«Páter satyp alýǵa kómektesemin» degen jeleýmen 100 mıllıon teńge jymqyrǵan kúdikti Grýzııadan ekstradıtsııalandy
ASTANA. KAZINFORM - Búgin Qazaqstan Bas prokýratýrasy men Іshki ister mınıstrligi Interpolynyń qyzmetkerleri Grýzııadan asa iri mólsherdegi alaıaqtyq jasady degen kúdikpen Qazaqstan Respýblıkasynyń azamatyn ekstradıtsııalady.
Ol 2021 jylǵy qańtar men 2022 jylǵy aqpan aralyǵynda Atyraý qalasynda Kıprdan páter satyp alýǵa járdem kórsetemin degen syltaýmen, birneshe aqshalaı aýdarym arqyly, Qazaqstan Respýblıkasynyń azamatshasynyń 100 mıllıon teńgeden astam aqshalaı qarajatyn alaıaqtyq jolmen jymqyryp ketken degen kúdikke ilindi.
Qylmys jasaǵannan keıin kúdikti jasyrynyp, osyǵan baılanysty halyqaralyq izdeý jarııalanǵan. 2026 jylǵy maýsymda ol Grýzııa aýmaǵynda ustalyp, Qazaqstan Respýblıkasy Bas prokýratýrasynyń suraý salýy boıynsha Qazaqstanǵa ekstradıtsııalandy.
Qazirgi ýaqytta kúdikti tergeý ızolıatoryna qamaýǵa alyndy.
Oǵan taǵylyp otyrǵan qylmys úshin múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan on jylǵa deıingi merzimge aıyra otyryp, on jylǵa deıingi merzimge bas bostandyǵynan aıyrý jazasy kózdelgen.
Buǵan deıin esirtki saýdasynan túsken kiristi zańdastyrǵan kúdikti Grýzııadan ekstradıtsııalanǵanyn jazǵan edik.
