Páter satarda neni bilý kerek: Qazaqstanda múlik satqanda túsetin tabysqa salyq esepteý tártibi ózgerdi
ASTANA. KAZINFORM — Qazaqstanda múlikti satqanda túsetin tabysqa salyq salýdyń jańa tártibi kúshine endi. Endi salyq satylǵan múliktiń tolyq qunynan emes, tek naqty alynǵan paıdadan esepteledi. Bul týraly Mańǵystaý oblysy boıynsha Memlekettik kirister departamenti málshim etti.
2026 jylǵy 1 qańtardan bastap elimizde jańa Salyq kodeksi qoldanysqa engizildi. Jańa normalardyń maqsaty – salyq salý júıesin ádil ári ashyq etý.
Endi salyq tek naqty tabysqa salynady
Jańa tártipke sáıkes, salyq páterdiń nemese ózge de múliktiń satylǵan jalpy qunynan emes, satyp alý jáne satý baǵasynyń aıyrmasynan esepteledi.
Mysaly, páterdi 20 mln teńgege satyp alyp, 25 mln teńgege satsańyz, salyq tek 5 mln teńge kólemindegi tabysqa ǵana esepteledi.
Jyljymaıtyn múlikke qatysty ózgerister
Bul ereje páter, jeke úı, saıajaı, garaj jáne avtoturaq sııaqty jyljymaıtyn múlikke qoldanylady.
Múlikti ıelený merzimi salyq tóleýde negizgi ról atqarady.
Eger jyljymaıtyn múlik 2026 jylǵy 1 qańtardan keıin satyp alynǵan bolsa, ony satqan kezde salyqtan bosatylý úshin menshik ıesi múlikti keminde eki jyl ıelenýi tıis.
Al 2026 jylǵa deıin satyp alynǵan jyljymaıtyn múlikke burynǵy tártip saqtalady: eger menshik ıesi ony bir jyldan astam ýaqyt ıelense, salyq tólemeıdi.
Salyq mólsherlemesi qalaı esepteledi?
2026 jyldan bastap ósimnen alynatyn tabysqa progressıvti mólsherleme engizildi.
-
Negizgi mólsherleme – 10 paıyz.
-
Eger satýdan túsken paıda 8 500 aılyq eseptik kórsetkishten (shamamen 36,7 mln teńge) assa, osy shekten asqan bóligine 15 paıyzdyq mólsherleme qoldanylady.
Mańyzdysy – 15 paıyzdyq salyq búkil tabysqa emes, tek belgilengen shekten asqan somaǵa ǵana esepteledi.
Mysaly, páterdi 30 mln teńgege satyp alyp, 35 mln teńgege satsańyz, 5 mln teńge tabys tapqan bolyp eseptelesiz. Bul jaǵdaıda tólenetin salyq – 500 myń teńge (5 mln teńgeniń 10 paıyzy).
Kólik satýdaǵy tártip
Avtokólik pen basqa da jyljymaly múlikke ózge talaptar qoldanylady.
Eger kólik tirkelgen kúnnen bastap bir jylǵa jetpeı satylsa, satyp alý jáne satý baǵasynyń aıyrmasynan 10 paıyz salyq tólenedi.
Al kólikke bir jyldan astam ıelik etken jaǵdaıda salyq salynbaıdy.
Deklaratsııa tapsyrý mindetti
Múlik satqan azamattar 270.00 nysany boıynsha salyq deklaratsııasyn satýdan keıingi jyldyń 15 qyrkúıegine deıin tapsyrýy qajet.
Mysaly, eger múlik 2026 jyly satylsa, deklaratsııany 2027 jyldyń 15 qyrkúıegine deıin ótkizý kerek.
Shetel azamattaryna arnalǵan talap
Shetel azamattary úshin bólek tártip qarastyrylǵan. Olar múlikti qansha ýaqyt ıelengenine qaramastan, satýdan túsken tabysqa 15 paıyz mólsherinde salyq tóleıdi.
Buǵan deıin salyq boıynsha jańa túzetýler tamyz aıynyń sońyna deıin daıyn bolatynyn jazdyq.
