Páter, noýtbýk, iPhone: UBT-dan 140 ball jınaǵan túrkistandyq túlekke qandaı syılyqtar berildi
TÚRKІSTAN. KAZINFORM - Jánibek Ábilhanǵa qosymsha bilim berý ortalyǵynyń basshylyǵy páterdiń sertıfıkatyn tabys etti.
Buǵan deıin atalǵan bilim berý ortalyǵy áleýmettik jelilerde 140 ball jınaǵan túlekke syı retinde páter beriletindigin málimdegen bolatyn. Al, sol ortalyqta bilim alǵan Jánibek Ábilhan UBT-dan 140 upaı aldy. Ortalyq basshylyǵy da ýádesinde turdy. Búgin páterdiń sertıfıkaty saltanatty túrde Jánibek pen onyń anasyna tabystaldy.
— Turǵyn úıdi rásimdeý Jánibek oqýǵa túsetin qalaǵa baılanysty júzege asady. Eger ol Astanany tańdasa, páter elordadan beriledi, al Almatyny tańdasa — páter sol jaqtan beriledi, — dep atap ótti bilim berý ortalyǵynyń ókilderi.
Sonymen qatar, UBT-daǵy joǵary nátıjesi úshin Jánibek bilim salasy ókilderinen baǵaly syılyqtar aldy. Mektep dırektory túlekke iPhone smartfonyn, aýdandyq bilim bóliminiń basshysy noýtbýk, al aýdan ákimi teledıdar syıǵa tartty.
Aıta keteıik, Jánibek UBT-ny «Matematıka — Informatıka» pánder kombınatsııasy boıynsha tapsyrǵan. Ol aýyldyq mektep-gımnazııany aıaqtap, Almatyda aqparattyq tehnologııalar salasy boıynsha bilimin jalǵastyrýdy josparlap otyr.
Eske sala keteıik, budan buryn Ordabasy aýdanynyń turǵyny, Shoqan Ýálıhanov atyndaǵy mektep-gımnazııa túlegi Ábilhan Jánibek Ulttyq biryńǵaı testileýden eń joǵary nátıje — 140 upaı jınaǵanyn jazǵan bolatynbyz.