Páter men kólik satyp alarda aldymen qandaı qujatty tekserý qajet - sarapshy jaýaby
ALMATY. KAZINFORM – «Qazaqstan tutynýshylar ulttyq lıgasy» RQB prezıdentiniń orynbasary Vasılıı Romanovskıı múlik boıynsha mámilede qandaı qujattarǵa nazar aýdarý ekenin aıtty.
Onyń aıtýynsha, jyljymaıtyn múlik pen kólik satyp alarda tólem jasamas buryn qujatty tekserip, satýshynyń ýádesin resmı qujatta bekitip alý qajet. Tek aýyzsha kelisimge senip qalýǵa bolmaıdy. Jyljymaıtyn múlik pen kólik alýǵa qomaqty qarajat ketetindikten, qujatty rásimdeý kezindegi az ǵana qateliktiń ózi edáýir shyǵynǵa alyp kelýi múmkin.
- Adamǵa josparda kórsetilgen páterden shartta jazylǵan onyń sıpattamasy basqa bolýy múmkin. Sondyqtan tek satýshynyń sózine nemese jarnamalyq materıaldarǵa súıenýge bolmaıdy, málimetterdi qujattarmen salystyrý qajet. Satýshynyń barlyq mańyzdy ýádeleri shartta jazbasha túrde kórsetilýi tıis. Eger olar qujatta bolmasa, keıin óz quqyǵyńyzdy dáleldeý sizge qıynǵa túsedi, – dedi Vasılıı Romanovskıı.
Sarapshy páter satyp alǵan kezde menshik quqyǵyn rastaıtyn qujatty, nysannyń alańy men josparyn, kepildiń, tyıym salýdyń, qamaýǵa alý men satýǵa qoıylǵan basqa da shekteýdiń bar-joǵyn tekserip alý qajet ekenin aıtty.
Onyń sózinshe, páterdiń barlyq mańyzdy sıpattamasy - mekenjaıy, alańy, quny, turǵyn úıdiń jaǵdaıy, ony berý merzimi, sondaı-aq jyljymaıtyn múlikti jańa menshik ıesine bergenge deıin paıda bolǵan bereshekti óteý boıynsha satýshynyń mindettemesi tikeleı shartta kórsetilýi tıis.
Ol qurylysy áli aıaqtalmaǵan turǵyn úı kesheninen páter alarda erekshe saq bolýǵa shaqyrdy. Munda qurylystyń keshigýi nemese toqtap qalýy, qurylys kompanııasynyń bankrotqa ushyraýy, sondaı-aq páterdiń alańy, árleýi men basqa tustarynyń ózgerýi syndy qaýip bar.
- Eger páter satyp alynǵannan keıin másele anyqtalsa, aldymen ony rastaıtyn qujattardy jınaýǵa jáne olarǵa aýyrtpalyqtar týraly málimetter, bereshek týraly aqparat, eseptegish kórsetkishteri, turǵyn úıdiń qabyldap alǵan kezdegi jaǵdaıyn rastaıtyn qujattar men basqa da dálelder jatady. Osydan keıin satýshyǵa buzýshylyqty joıý, bereshekti óteý, keltirilgen shyǵyndy óteý nemese shartty buzý sııaqty naqty talap kórsetilgen jazbasha narazylyq joldanady. Tutynýshylardyń quqyǵyn qorǵaý týraly Zańnyń 42-4-babyna sáıkes, satýshy talappen kelispegen jaǵdaıda 10 kúntizbelik kún ishinde dáleldi jazbasha jaýap berýi tıis, - dedi ol.
Avtokólik boıynsha mámile
Kólikti avtosalonnan satyp alarda da birneshe jaıtqa nazar aýdarý qajet. Qabyldaý-tapsyrý aktisine qol qoımas buryn satyp alýshy VIN-nómirin, kóliktiń qańqasyn, júrisin, ishki jıyntyqtalýyn, qujattary men syrtqy zaqymdardyń bar-joǵyn salystyryp tekserýi kerek. Eger aqaý tabylyp jatsa, olardy aktide jazbasha túrde tirkeý kerek.
- Satyp alynǵan kólikter óndiristik aqaý anyqtalǵan jaǵdaıda dılerge aýyzsha júginýmen shektelýge bolmaıdy. Satýshyǵa avtokóliktiń markasy, VIN-nómiri, júris kórsetkishi, aqaýdyń anyqtalǵan kúni, onyń sıpattamasy men satyp alýshynyń naqty talaby kórsetilgen jazbasha narazylyq jiberý qajet. Shartty, servıstik kitapshany, dıagnostıka nátıjelerin, fotosýretter men satýshymen bolǵan barlyq hat almasýdy saqtaý qajet. Keıin daý týyndaǵan jaǵdaıda dál osy qujattar aqaýdyń qashan paıda bolǵanyn jáne dıler satyp alýshynyń ótinishine qalaı áreket etkenin dáleldeýge kómektesedi, – dep atap ótti sarapshy.
Avtokólik tehnıkalyq kúrdeli taýar sanatyna jatatyndyqtan, eleýli aqaý bolǵan jaǵdaıda ǵana ony aýystyrý nemese aqshany qaıtarý múmkindigi qarastyrylady. Mundaı aqaýǵa: jıi qaıtalanatyn buzylýlar, uzaq ýaqyt jóndeýde turý, avtokólikti paıdalaný múmkindiginiń bolmaýy jáne t.b. jatady. Vasılıı Romanovskııdiń aıtýynsha, eleýli aqaý bolǵan jaǵdaıda zań boıynsha aqshany qaıtarý úsh jumys kúni ishinde, al avtokólikti aýystyrý 30 jumys kúni ishinde júrgizilýi tıis.
Qoldanylǵan avtokólikti jeke tulǵadan satyp alǵan jaǵdaıda bólek erejeler qoldanylady. Eger satýshy qarapaıym azamat bolyp, avtokólikterdi kásipkerlik maqsatta satýmen aınalyspasa, «Tutynýshylardyń quqyqtaryn qorǵaý týraly» zańnyń normalary mundaı mámilege qoldanylmaıdy. Sondyqtan satyp alýshynyń negizgi qorǵanysy – kólikti aqsha bermes buryn muqııat tekserý.
Eske salaıyq, bıyl tutynýshylarǵa 1,5 mlrd teńge qaıtaryldy.
