Páter kezeginen aıaq astynan shyǵyp qalǵan jalǵyzbasty ana Batalovtan kómek surady
TALDYQORǴAN.QazAqparat - Taldyqorǵanda páter kezeginde birinshi bolyp turǵan Yrysbýbl Estemesova Amandyq Batalovtan kómek surady. Ol 14 jyl boıy páter kútip, dál kezegi jetkende tizimnen aıaq astynan shyǵyp qalǵan, dep habarlaıdy QazAqparat tilshisi.
Yrysbýbl Estemesova 14 jyl buryn múgedek balasy bar ana retinde páter kezegine tirkelgen. Biraq 4 jyl buryn sal aýrýyna shaldyqqan balasy kenetten qaıtys bolypty. Jalǵyz balasynan aıyrylǵan ana Taldyqorǵan qalalyq turǵyn úı bólimine balasynyń qazasy jóninde jazbasha habar bergen.
«Ótinishimniń bárinde kórsettim. Balam qaıtys boldy. Men úısizbin. Úı maǵan osy sanatta beriledi me, beriletin bolsa qashan beriledi dep jazdym. Ol jaqtan Nurlan Qystaýbaev ótinishke jazbasha jaýap bergen. Haty qolymda. Kezegińiz boıynsha alasyz dedi. Al endi dál kezegim jetkende sizdiń balańyz qaıtys bolǵan. Sizge baspana berilmeıdi dep shyqty. Sonda 2015 jyldan beri Taldyqorǵan qalasynyń TÚKSh bólimi qaıda qarady. Solardyń salǵyrttyǵy saldarynan men endi baspanasyz qaldym. Almaty oblysynyń ákimi Amandyq Batalovtan jalyna kómek suraımyn. Myna ádiletsizdikke kómektesińizshi», - dedi jalǵyz balasynan aıyrylǵan ana Yrysbýbl Estemesova.
Yrysbýbl Estemesova balasy qaıtys bolǵannan keıin de jylda páter kezeginiń jyljyp jatqandyǵy jóninde anyqtama alyp otyrǵan. Al osy anyqtamany páter kezegi birinshi bolyp jetkenge deıin Taldyqorǵan qalalyq TÚKSh bólimindegiler berip kelgen.
«Zań boıynsha balanyń qaıtys bolǵandyǵy jóninde anyqtama alyp keldi ǵoı, sol kezden bastap bul kisini kezekten alyp tastaý kerek. 2015 jyldan 2019 jyl aralyǵynda baspana kezegine qaıta tursam kezegim osy ýaqytta birshama jyljıtyn edi dep bul kisi narazylyǵyn aıtyp tur. Sol sebepti, máseleni túsinip bul kisininiń máselesin arnaıy komıssııanyń qaraýyna usynamyz», - dedi Taldyqorǵan qalalyq TÚKSh bóliminiń sektor meńgerýshisi Danııar Orazov.
Almaty oblystyq aýrýhanada medbıke bolyp jumys isteıtin Yrysbýbl Estemesovaǵa páter beriledi me endi arnaıy komıssııa sheshetin bolady. Al Taldyqorǵan qalalyq turǵyn úı bólimindegilerdiń salǵyrtyǵy saldarynan san soǵyp qalǵan jalǵyzbasty ana ádiletti sheshim bolatynyna úmitti.
