Páter ıesi egizdiń múrdesin tońazytqyshtan qalaı kórgenin aıtty
ALMATY. QazAqparat - Almatyda egiz balalardyń ólimine qatysty sot otyrysynda kýáger, páter ıesi Málıka Ibraeva balalardyń múrdesin qalaı kórgenin aıtty, dep habarlaıdy QazAqparat tilshisi sot zalynan.
Onyń aıtýynsha, Volchenko páterdi bir kúnge jaldaǵan, sosyn taǵy bir kúnge alatynyn jetkizgen.
12 qyrkúıek kúni túske jaqyn kórshiler páter ıesine soǵyp, úıden sasyq ıis shyǵyp turǵanyn aıtqan.
«Men basynda et sasyp ketken shyǵar dep oıladym. Páterge kirdim eshkim joq boldy. Tońazytqysh buryshta turatyn. Ashyp qalyp edim ishinen sómke jerge tústi. Onyń ishinde balanyń basy jatqan sııaqty kórinip, shoshyp kettim de polıtsııa shaqyrdym», - dedi Ibraeva.
Eske sala ketsek, 11 qyrkúıek kúni jantúrshigerlik oqıǵa Túriksib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabylǵan . Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy. Qazirgi ýaqytta sot aldynda Qazaqstan azamatshasy Alla Volchenkomen onyń azamattyq nekedegi Ózbekstan azamaty Emıl Gılmýtdınov jaýap berýde. Olarǵa qatysty QR QK 99-babynyń 2-bólimi 1,3,7 (kisi óltirý) tarmaqtary jáne 119-baptyń 1 bólimi (qaraýsyz qaldyrý) boıynsha is qozǵalǵan.
