Páter ıeleri kooperatıvteriniń qyzmetine jańa talaptar qoıylady
ASTANA. KAZINFORM — Búgin Májilistiń jalpy otyrysynda turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly zań jobasy birinshi oqylymda qaralyp jatyr.
— Ókinishke qaraı, úkimet 2019 jyldan beri júrgizip kele jatqan turǵyn úı qoryn basqarý júıesin reformalaý maqsatyna jete almady. Munyń obektıvti jáne sýbektıvti sebepteri bar. Memleket basshysy 2023 jyly sáýirde Úkimettiń keńeıtilgen otyrysynda reformaǵa shynaıy baǵa berý qajettigin atap ótti. Osyǵan baılanysty, jiberilgen qatelikter men isterdiń naqty jaǵdaıyn eskere otyryp, depýtattyq korpýsqa kondomınıýmdardy basqarýdyń quqyqtyq negizin qaıta qaraý tapsyryldy. Bul zań jobasy osy tapsyrmany oryndaý úshin daıyndaldy, — dedi Májilis depýtaty Ekaterına Smyshlıaeva zań jobasyn tanystyra turyp.
Halyq qalaýlysynyń aıtýynsha, jańa zań jobasy eki negizgi máseleni sheshedi.
— reforma júrgizilgen 6 jyl ishinde ınstıtýt retinde joıylmaǵan páter ıeleri kooperatıvteri qyzmetiniń ashyqtyǵyna qoıylatyn talaptardy engizý;
— turǵyndardyń kondomınıýmdy basqarý nysandary men sharttaryn tańdaýy úshin barynsha erkin quqyqtyq orta qurý.
Ol úshin zań jobasynda kondomınıýmdy basqarýdyń eki túri engizilgen:
• múlik ıelerin biriktirý;
• tikeleı birlesken basqarý.
— Páter ıeleri kooperatıvteriniń basqarý sýbektisi retindegi qyzmetine jańa talaptar qoıylady. Atap aıtqanda, sýbektini qaıta tirkeý tártibi, quqyq belgileıtin qujattardy berý tártibi, sol sııaqty jumystyń ashyqtyǵyna qoıylatyn talaptar bar. Sol sııaqty menshik ıeleri birlestigi tóraǵasynyń ókilettik merzimi bir jyldan úsh jylǵa deıin ulǵaıady, menshik ıeleriniń birlestigine úıdi basqarý jónindegi qyzmetti óz erkimen júrgizýge quqyq beriledi jáne qurylys salýshynyń birinshi páterdi satqannan keıin kondomınıýmdy tirkeý mindettemesi kózdeledi, — deıdi E. Smyshlıaeva.
Zań jobasymen ákimshilik jaýapkershilik kúsheıtiledi:
— birinshi, turǵyndarǵa esep bermegeni úshin;
— ekinshi, úıge qajetti qujattardy usynýdan bas tartqany úshin.
— Usynylǵan ózgerister kóp páterli turǵyn úı turǵyndarynyń quqyǵyn qorǵaýǵa baǵyttalǵan.
— Tek qana olardyń ortaq sheshimimen tıisti basqarý nysany qabyldanady, basqarýshy kompanııa tańdalady jáne tarıf bekitiledi. Atalǵan talaptar zań jobasynda basqarýdyń barlyq nysandaryna kózdelgen, — dep tolyqtyrdy Májilis depýtaty.
Eske sala ketsek, turǵyn úı-kommýnaldyq sharýashylyǵy ulttyq jobasyn ázirleý byltyr qolǵa alyndy.
Sondaı-aq, ótken jyly turǵyn úı-kommýnaldyq sharýashylyǵynyń biryńǵaı platformasy qurylatyny aıtyldy.