Páter almaq bolǵan Aqtóbe turǵyny aldanyp qaldy
AQTÓBE. QazAqparat – Aqtóbelik páter satyp alýdy josparlap, alaıaqqa 500 myń teńge aqshasyn berip jiberdi, dep habarlaıdy QazAqparat tilshisi.
Aqtóbe oblystyq polıtsııa departamentiniń qyzmetkerleri alaıaqtyq jasaǵan qala turǵynyn qolǵa túsirdi.
Kúdikti úı satyp almaq bolǵan adamdy aldap, onyń 500 myń teńge aqshasyn alyp ketken.
«Kúdikti buǵan deıin taǵy bir adamdy aldaǵan. Júrgizýshi kýáliginen aıyrylǵan aqtóbeliktiń qujatyn qaıta alyp berýge ýáde etip, 130 myń teńgesin alyp ketti. Atalǵan faktiler boıynsha QR Qylmystyq kodeksiniń «Alaıaqtyq» boıynsha sotqa deıingi tergeý bastaldy», - dedi oblystyq PD baspasóz qyzmetiniń jetekshisi Erbolat Sarqulov.
Kúdiktiniń kinási dáleldense 1000 AEK deıingi mólsherde aıyppul salynady nemese 2 jylǵa deıingi merzimge bas bostandyǵynan shekteý jazasy qarastyrylǵan.
Aqtóbe oblysynyń polıtseıleri asa saq bolýǵa jáne alaıaqtardyń qurbany bolmas úshin beıtanys adamdarǵa senbeýge shaqyrady.
