Páter alyp beremin: oraldyqtardy 7,5 mln teńgege aldaǵan alaıaq sottaldy

ASTANA. KAZINFORM – Oral qalasynyń azamaty turǵyndarǵa memlekettik baǵdarlama arqyly turǵyn úı alyp beremin degen ýádemen 7,5 mln teńge ıemdengen. Іstiń mán-jaıy týraly QR Sybaılas jemqorlyqqa qarsy is-qımyl agenttiginiń resmı ókili Arman Tileýkenov aıtyp berdi.

«2024 jylǵy 1 naýryzda Oral qalalyq sotynyń úkimimen azamat Nı alaıaqtyq áreketi jáne para bergeni úshin 7 jylǵa bas bostandyǵynan aıyrylyp, sottaldy. Úkim zańdy kúshine engen joq. Ol azamattardan Oral qalasy ákimdiginiń laýazymdy tulǵalaryna aqsha berip, memlekettik baǵdarlama boıynsha páter alyp beremin degen syltaýmen jalpy somasy 7,5 mln teńge ıemdengen», - dedi Arman Tileýkenov vedomstvoda ótken brıfıngide.

Agenttiktiń málimetinshe, ótken jyly alaıaqtyq faktileri boıynsha 159 qylmystyq is qozǵalǵan. Onyń 40-qa jýyǵy para berýge ıtermeleý áreketi. Byltyr alaıaqtyq jasaǵany úshin 133 azamat sottalǵan jáne olarǵa berilgen soma 14,6 mlrd teńgeden asady.

Osy oraıda agenttiktiń resmı ókili alaıaqtyq faktisi boıynsha 1424 nómirli Call-ortalyǵyna habarlasýdy surady.