Páter alaıaqtaryn ustaýǵa kómektesken aqmolalyq úsh mektep oqýshysy marapattaldy
KÓKShETAÝ. QazAqparat - Aqmola oblysynda polıtseıler Tselınograd aýdanyndaǵy birneshe páter urlyǵyn ashýǵa járdem kórsetken úsh mektep oqýshysyn marapattady, dep habarlady ІІD baspasóz qyzmeti.
Tselınograd aýdany Qaraótkel aýylynyń №2 mektebiniń 9 synyp oqýshysy Janserik Baqytjan, Aıan jáne Temirlan Pyshınskıılerge quqyq saqshylary mekteptiń saltanatty jıynynda alǵys hattar men qol saǵattaryn tabys etti.
Olar ishki ister organdaryna aýyr qylmystyń betin ashýǵa kómekteskeni, azamattyq paryzdaryn úlgili oryndaǵandary úshin marapattaldy. Alǵys hatty JPQ bastyǵy polıtsııa maıory Ermek Medeýbaev tabys etti.
Polıtseılerdiń aıtýynsha, osy jyly aqpanda Qaraótkel aýylynda birneshe páter urlyǵy tirkelgen. Alaıaqtar aýyl turǵyndarynyń úıine kirip, turmystyq tehnıka, asyl zattar men aqsha urlaǵan. Úı ıeleriniń shyǵyny mıllıondaǵan teńgeni quraǵan. Osyndaı urlyqtardyń birin kóshede júrgen jasóspirimder baıqap qalǵan.
Oqýshylardyń aıtýynsha, keshke olar kórshi úılerdiń birine belgisiz adamdardyń kirip jatqanyn kórgen. «BMV» kólikteri jaqyn jerde turǵan. Birden qaýiptengen olar kúdikti kólikti uıaly telefondaryna túsirip alǵan. Urylardy sol arqyly tapqan.
Birneshe kúnnen keıin alaıaqtar elorda aýmaǵynan ustaldy, qylmystyq is qozǵalyp, birqatar tergeý sharalary taǵaıyndaldy. Olardyń birneshe qylmysqa qatystylyǵy bary anyqtaldy.
«...Biz balalarǵa azamattyq ustanymy úshin, qylmysty ashýǵa járdemdeskeni úshin alǵys bildiremiz. Olardy tárbıelegen ata-analary men ustazdaryna da rahmet. Olar bergen aqparat polıtseılerge kúdiktilerdi ustap, yqtımal basqa qylmystyń aldyn alýǵa járdemdesti...», - dedi Ermek Medeýbaev.
