Pashınıan Ońtústik Kavkaz óńirindegi turaqtylyqqa kepil bolatyn faktorlardy atady
EREVAN. KAZINFORM — BUU Bas Assambleıasynyń 81-shi sessııasynda sóz sóılegen Armenııanyń premer-mınıstri Nıkol Pashınıan Ońtústik Kavkaz óńirindegi turaqtylyqty qamtamasyz etip, ózara tıimdi qarym-qatynastyń negizi bolatyn birineshe faktordy atady, dep habarlaıdy Kazinform agenttiginiń Erevandaǵy menshikti tilshisi.
Sóz basynda Nıkol Pashınıan byltyr qabyldanǵan Armenııa men Ázerbaıjan arasyndaǵy beıbit kelisimge toqtalyp, mámilege kelý jolynda qoldaý kórsetken AQSh prezıdenti Donald Trampqa alǵys bildirdi. Onyń aıtýynsha, qol jetkizilgen ýaǵdalastyq Ońtústik Kavkaz aımaǵy úshin jańa múmkindikterge jol ashty.
— 35 jylǵa jýyq ýaqytqa sozylǵan qaqtyǵystan keıin biz qazir Shyǵys-Batys temirjol magıstralimen qatar, qubyr jáne elektr jelilerin, avtomobıl joldaryn salý máselelerin talqylap jatyrmyz. Munyń barlyǵy TRIPP («Tramptyń halyqaralyq beıbitshilik pen órkendeý baǵyty») jobasy aıasynda júzege asyrylyp keledi. Bul joba tutas Ońtústik Kavkaz óńiriniń beıbitshilik qıylysyna aınalýyna múmkindik beredi, — dep málim etti ol.
Sonymen qatar Nıkol Pashınıan aldaǵy ýaqytta tıimdi sheshimin tabýy tıis máselelerge de nazar aýdardy.
— Armenııa men Ázerbaıjan arasyndaǵy qarym-qatynasta áli de sheshimin tabýy tıis máseleler bar. Atap aıtqanda, habar-osharsyz ketken birneshe myń adamnyń taǵdyryn anyqtaý boıynsha Ázerbaıjanmen yntymaqtastyq ornatý jóninde kelisimge qol qoıdyq. Resmı Erevan mınalardy zalalsyzdandyrý jumystaryn Ázerbaıjanmen yntymaqtastyqta jalǵastyrýǵa nıetti. Sondaı-aq, Armenııa tarapy qaqtyǵys saldarynan Ázerbaıjanda ustalǵan armıandardyń elge oralýyn asyǵa kútip otyr, — dedi Nıkol Pashınıan.
Ol atap ótkendeı, Armenııa syrtqy saıasatta tıimdi teńgerimdi saqtaýǵa asa mán beredi. Tıisinshe, keıingi birneshe jylda 10-nan astam elmen strategııalyq qarym-qatynas ornady, olardyń ishinde Qazaqstan da bar.
— Armenııa teńgerimdi ári baıypty syrtqy saıasat ustanymyn ilgerilete bermek. Bul — Birikken Ulttar Uıymynyń negizgi qaǵıdattarynyń biri. Sońǵy jyldary biz Qazaqstan, Grýzııa, Frantsııa, Qytaı, Nıderland, Germanııa, Lıýksembýrg, Ulybrıtanııa, Bolgarııa, Horvatııa, Lıtva, AQSh jáne Eýropa odaǵymen strategııalyq qarym-qatynas ornattyq, — dep qorytyndylady Armenııanyń úkimet basshysy.
Eske salaıyq, buǵan deıin Nıkol Pashınıan TRIPP jobasyn júze asyrý aımaqtaǵy ózara kólik baılanysyn tolyq qamtamasyz etýge múmkindik beretinin aıtyp edi.
