Pashınıan Qazaqstanǵa resmı saparmen kelýdi josparlap otyr

ASTANA. KAZINFORM - Armenııa Premer-Mınıstri Nıkol Pashınıan Memleket basshysy Qasym-Jomart Toqaevty Respýblıka kúnimen quttyqtady.

– Sizdi jáne Qazaqstan halqyn Qazaqstan Respýblıkasynyń ulttyq merekesi – Respýblıka kúnimen shyn júrekten quttyqtaımyn. Qazaqstannyń táýelsiz memlekettiligin nyǵaıtýǵa, saıası jáne azamattyq ınstıtýttardy damytýǵa, eldiń áleýmettik-ekonomıkalyq, ǵylymı, bilim berý jáne mádenı damýyn ilgeriletýge baǵyttalǵan reformalar shynymen de mańyzdy. Sizdiń kóregen tásilderińiz ben dáıekti jáne prıntsıpti qadamdaryńyzdyń arqasynda Qazaqstan búginde aımaqtyq jáne jahandyq isterde mańyzdy ról atqarady, halyqaralyq arenada qurmetke ıe, - delingen quttyqtaý hatynda.

Pashınıan halyqtar arasyndaǵy berik dostyq pen ózara qurmet dástúrlerine negizdelgen memleketaralyq qatynastardyń qarqyndy damýyna senim bildirdi.

– Halyqtarymyz arasyndaǵy berik dostyq pen ózara qurmet dástúrlerine negizdelgen memleketaralyq qatynastardyń qarqyndy damýy, sondaı-aq ótken jylǵy resmı saparyńyz kezinde qol jetkizilgen kelisimderdiń júzege asyrylýy Erevan men Astana arasyndaǵy yntymaqtastyqtyń tereńdeýiniń jańa kórinisine ákeletinine senimdimin, - delingen málimdemede.

Armenııa Premer-Mınıstri sondaı-aq Qazaqstanǵa saparmen kelý jospary týraly aıtty.

– Jaqyn arada josparlanǵan Qazaqstanǵa resmı saparym barysynda dostyq, órkendeý jáne bolashaqqa baǵyttalǵan ekijaqty strategııalyq qarym-qatynastardy damytý maqsatynda armıan-qazaq memleketaralyq kún tártibin talqylaımyz dep úmittenemin. Osy múmkindikti paıdalana otyryp, sizge myqty densaýlyq jáne dostas Qazaqstan halqynyń ıgiligi úshin atqaratyn jumysyńyzda tabys tileımin, - dep túıindedi Nıkol Pashınıan.

Eske sala keteıik, Armenııa premer-mınıstri Nıkol Pashınıan Prezıdent Qasym-Jomart Toqaevqa Ázerbaıjannyń júk tranzıtine qoıǵan shekteýlerdi alyp tastaý týraly kelisimge qol jetkizgeni úshin alǵys aıtty.