Pashınıan Ázerbaıjanmen jaqyn arada beıbitshilik kelisimine qol qoıýǵa basymdyq beredi
ASTANA. KAZINFORM — Armenııa premer-mınıstri Nıkol Pashınıan eldiń Ázerbaıjanmen jasalǵan, aldyn ala kelisilgen beıbitshilik kelisimine jaqyn arada qol qoıýǵa jáne ony ratıfıkatsııalaýǵa nazar aýdarýy kerektigin málimdedi, dep habarlaıdy Kazinform agenttiginiń menshikti tilshisi Armenpress-ke silteme jasap.
— Osy iske asqan sátte biz Armenııa memlekettiliginiń myzǵymastyǵynyń negizin qalaǵanymyzdy naqty aıta alamyz, — dedi Pashınıan.
Ol sondaı-aq «Erkin jáne baqytty Armenııa» tujyrymdamasyna negizdelgen ǵumyrly memleket strategııasyn júzege asyrý qajettiligin atap ótti.
Eske sala keteıik, 2025 jyldyń 8 tamyzynda Vashıngtonda ótken úshjaqty kezdesýden keıin Ázerbaıjan, Armenııa jáne AQSh kóshbasshylary Baký men Erevan arasyndaǵy beıbit retteý týraly birlesken deklaratsııa qabyldady.
Ázerbaıjan, Armenııa jáne AQSh kóshbasshylary Aq úıdegi beıbitshilik sammıtiniń bir jyldyǵyna oraı birlesken málimdeme jasady.
