Pashınıan Ázerbaıjanmen ilgerileýdi tarıhı kezeń dep atady
ASTANA. KAZINFORM — Armenııa men Ázerbaıjan premer-mınıstrleri orynbasarlarynyń ózara saparlary tarıhı oqıǵa bolyp sanalady. Bul týraly Armenııa premer-mınıstri Nıkol Pashınıan Ázerbaıjan premer-mınıstriniń orynbasary Shahın Mýstafaevtyń Armenııaǵa saparyna qatysty pikir bildire otyryp aıtty, dep habarlaıdy Kazinform agenttiginiń menshikti tilshisi Armenpress-ke silteme jasap.
— Óte mańyzdy oqıǵa boldy. Men eki eldiń premer-mınıstr orynbasarlarynyń saparlaryn beıbitshilik úderisiniń ınstıtýtsıonaldyq logıkasy aıasyndaǵy tarıhı kezeń dep baǵalaımyn. Osy mejege jetkenimizge óte qýanyshtymyn, — dedi Pashınıan.
Onyń aıtýynsha, Armenııa men Ázerbaıjan arasyndaǵy qatynastar únemi jaqsaryp, beıbitshilik birtindep nyǵaıa túsýi kerek.
— Qalypty qarym-qatynas ornatý qajet, uzaq merzimdi ári strategııalyq turǵydan tatý kórshilik qatynastarǵa qol jetkizý mańyzdy, — dep atap ótti premer-mınıstr.
2026 jylǵy 9 sáýirde Armenııa premer-mınıstriniń orynbasary Mger Grıgorıan men Ázerbaıjan premer-mınıstriniń orynbasary Shahın Mýstafaevtyń teń tóraǵalyǵymen eki el arasyndaǵy shekarany demarkatsııalaý jónindegi komıssııalardyń 13-otyrysy ótti. Buǵan deıingi osyndaı otyrys ta Ázerbaıjanda ótken bolatyn.
Eske sala keteıik, Armenııa kórshiles eldermen shekarany delımıtatsııalaý jumystaryn aıaqtaýdy josparlap otyr.
