Pashınıan aıtpaǵan sóz jelide tarap ketti: Qazaqstanǵa qatysty aqparat joqqa shyǵaryldy
ASTANA. KAZINFORM — Áleýmettik jelilerde Armenııa Respýblıkasynyń premer-mınıstri Nıkol Pashınıannyń Qazaqstanǵa qatysty málimdemeleri týraly shyndyqqa sáıkes kelmeıtin aqparat taralyp jatyr.
Jalǵan aqparatqa qarsy is-qımyl ortalyǵy (JAQ) resmı arnasynyń málimetinshe, júrgizilgen tekserý nátıjesinde atalǵan dáıeksózdiń burmalanǵany anyqtaldy. Nıkol Pashınıan mundaı sózder aıtpaǵan. Manıpýlıatsııaǵa Armenııa Úkimeti basshysynyń 3 qyrkúıekte ótken brıfıngte jýrnalıstiń suraǵyna bergen jaýaby negiz bolǵan.
— Erevannyń sheshimderine syrtqy yqpaldyń bolýy týraly boljamǵa túsinikteme bere otyryp, Nıkol Pashınıan: «Sizderdiń aldaryńyzda Armıan KSR Kommýnıstik partııasy Ortalyq Komıtetiniń birinshi hatshysy turǵandaı áser qalyptasady», - dep málimdegen. Osylaısha, onyń sózi Armenııanyń memlekettik sheshimderdi óz betinshe qabyldaý máselesine qatysty bolǵan, — delingen habarlamada.
Vedomstvonyń málimetinshe, bul kontekste Qazaqstan týraly eshqandaı sóz aıtylmaǵan. Jalǵan aqparat avtorlary bastapqy jaýaptaǵy jekelegen sózderdi ózgertip, túpnusqada bolmaǵan sóz tirkesterin qosqan.
— Nátıjesinde málimdemeniń bastapqy máni ózgertilip, ol Qazaqstanǵa qarsy baǵyttalǵan pikir retinde ádeıi usynylǵan. Jaýaptyń túpnusqalyq mazmuny brıfıngtiń beınejazbasymen rastalady. Tolyq jaýap VERELQ jarııalanymynda berilgen. Mundaı manıpýlıatsııalar teris kóńil kúı qalyptastyrýǵa jáne Qazaqstan men Armenııa halyqtary arasynda jasandy túrde túsinispeýshilik týdyrýǵa baǵyttalǵan, — delingen habarlamada.
Jalǵan aqparatqa qarsy is-qımyl ortalyǵy áleýmettik jeli qoldanýshylaryn tekserilmegen dáıeksózder men jarııalanymdardy taratpaýǵa, aqparattyń bastapqy derekkózine, jarııalanǵan kúni men mánmátinine nazar aýdarýǵa shaqyrady.
Sondaı-aq, jalǵan aqparatty buryn jarııalaǵan adamdardan sol jazbalaryn óshirip, aqparattyń jalǵan ekenin habarlaýdy surady.
Esterińizge sala keteıik, jalǵan aqparat taratqany úshin QR ÁQBtK-niń 456-2-baby boıynsha ákimshilik jaýapkershilik qarastyrylǵan (250 AEK-ke deıingi aıyppul nemese zańda kózdelgen jaǵdaılarda ákimshilik qamaqqa alý). Qoǵamdyq tártipti buzý nemese zańmen qorǵalatyn quqyqtar men múddelerge eleýli zııan keltirý qaýpin týdyratyn kórineý jalǵan aqparat taratqany úshin QR QK-niń 274-baby boıynsha qylmystyq jaýaptylyq (7 jylǵa deıingi merzimge bas bostandyǵynan aıyrý) qarastyrylǵan.
Buǵan deıin Qazaqstan men Armenııa agroónerkásiptik ónimder saýdasyn arttyrý úshin jumys tobyn quratynyn jazǵanbyz.
