Pashınıan Armenııa men Ázerbaıjanǵa aýmaq aıyrbastaýdy usyndy
ASTANA. KAZINFORM — Armenııa premer-mınıstri Nıkol Pashınıan Erevan men Baký arasynda aýmaq aıyrbastaý bastamasyn kóterdi, dep habarlaıdy Kazinform agenttiginiń menshikti tilshisi.
Pashınıannyń aıtýynsha, osy arqyly memlekettik shekarany delımıtatsııalaý jáne demarkatsııalaý aıasynda anklavtar men eksklavtar máselesi sheshimin tappaq.
Áleýmettik jelilerde jarııalanǵan beınejazbada Armenııa úkimetiniń basshysy Ázerbaıjanmen qarym-qatynasty odan ári retteýge qatysty óz kózqarasyn bildirdi.
Pashınıan Armenııanyń aýmaǵy 29 743 sharshy shaqyrymdy quraýy, al shekarany delımıtatsııalaý jáne demarkatsııalaý protsesi Almaty deklaratsııasyna negizdelýi tıis ekenin atap ótti.
— Anklavtar men eksklavtar máselesi kelesi formýla boıynsha sheshilýi kerek: shekaranyń eki jaǵynda da anklavtar nemese eksklavtar bolmaýy kerek, ıaǵnı, eki el de, Armenııa da, Ázerbaıjan da anyq, sáıkes ólshemdegi aýmaqtardy almasýy kerek, — dedi premer-mınıstr.
Ol sondaı-aq taraptar bir-birine aýmaqtyq talaptar qoımaýy kerek ekenin atap ótti.
Sonymen qatar, Pashınıan Armenııanyń «Beıbitshilik qıylysy» bastamasy aıasynda da, odan tysta da barlyq kommýnıkatsııalardy ashýdy jaqtaıtynyn jetkizdi. Onyń aıtýynsha, eki eldiń aýmaqtary arqyly ótetin joldar kólik qozǵalysy úshin ashyq bolýy kerek.
Armenııa úkimetiniń basshysy Túrikmenstanda ótken Ázerbaıjan prezıdentimen áńgimeden keıin beıbitshilik protsesin odan ári ilgeriletýdiń múmkindigi bar degen qorytyndyǵa kelgenin aıtty.
— Biz jaqyn arada osy múmkindikti júzege asyrýmen aınalysamyz, — dep atap ótti Pashınıan.
Eske sala keteıik, 2025 jyldyń 8 tamyzynda Vashıngtonda ótken úshjaqty kezdesýden keıin Ázerbaıjan, Armenııa jáne AQSh kóshbasshylary Baký men Erevan arasyndaǵy beıbit retteý týraly birlesken deklaratsııa qabyldady.
Ázerbaıjan, Armenııa jáne AQSh kóshbasshylary Aq úıdegi beıbitshilik sammıtiniń bir jyldyǵyna oraı birlesken málimdeme jasady.
Pashınıan Ázerbaıjanmen jaqyn arada beıbitshilik kelisimine qol qoıýǵa basymdyq beredi.
