Pashınıan Armenııa EO-ǵa kirýge shamamen qashan ótinish beretinin aıtty
ASTANA. KAZINFORM — Armenııa premer-mınıstri Nıkol Pashınıan Armenııanyń Eýropa Odaǵyna kirýge 2027-2028 jyldary ótinish berýi múmkin ekenin aıtty, dep habarlaıdy Kazinform agenttiginiń menshikti tilshisi premer-mınıstrdiń resmı saıtyna silteme jasap.
Armenııa úkimetiniń basshysy bul týraly 3 qarashada Brıýsselde ótken EO-nyń keńeıýi máselelerine arnalǵan sammıt aıasynda Euronews arnasyna bergen suhbatynda málimdegen.
Ótinish berý merzimi týraly suraqqa jaýap bere otyryp, Pashınıan bul másele eýropalyq seriktestermen de, Armenııa ishinde de talqylanyp jatqanyn atap ótti. Ol, sondaı-aq Erevan qujatty resmı túrde tapsyrýǵa ǵana emes, Brıýsselmen aldyn ala saıası dıalogqa da múddeli ekenin jetkizdi.
— Biz úshin jiberý túımesin basyp, ótinish tapsyra salý ǵana emes, protsestiń barlyǵy dál osy másele boıynsha saıası dıalogpen qatar júrýi mańyzdy, — dep atap ótti premer-mınıstr.
Naqty merzimderge qatysty suraqqa bergen jaýabynda 2027 jyldy shynaıy merzim dep atap, 2028 jylǵa sozylýy múmkindigin de joqqa shyǵarmady.
Sonymen qatar Pashınıan EO-men vıza rejımin jeńildetý jaıyndaǵy dıalog Erevannyń qazirgi basymdyqtarynyń biri bolyp qala beretinin málimdedi. Armenııa tarapy 2029 jylǵa qaraı Eýropa Odaǵymen vızasyz rejımdi engizýge úmittenedi.
Premer-mınıstrdiń aıtýynsha, Armenııa men EO arasyndaǵy qarym-qatynas ekijaqty yntymaqtastyq tarıhyndaǵy eń joǵary deńgeıge jetken.
Buǵan deıin EO Armenııa ekonomıkasyn qoldaý úshin bul elden ımporttalatyn taýarlarǵa salynatyn kedendik bajdardy ýaqytsha alyp tastaýǵa daıyndalyp jatqany habarlanǵan bolatyn.
