Partııanyń Jarǵysyna ózgerister engizý kerek - Ashat Oralov

NUR-SULTAN. QazAqparat – Partııanyń Jarǵysyna ózgerister engizý kerek. Bul týraly «Nur Otan» partııasynyń kezekten tys sezinde partııanyń atqarýshy hatshysy Ashat Oralov málim etti, dep habarlaıdy QazAqparat.

«Qazirgi tańdaǵy ózgeristerge saı partııanyń basty baǵdarlamalyq qujattaryn qaıta qaraý qajet dep oılaımyz. Eń áýeli partııanyń Jarǵysyna ózgerister engizý kerek. Partııanyń jáne onyń fılıaldary Tóraǵasynyń birinshi orynbasary qyzmetiniń ornyna atqarýshy hatshy qyzmeti engiziledi. Partııanyń strategııalyq qujattaryna ózgerister men tolyqtyrýlar engizý de óte mańyzdy», - dedi A. Oralov.

Onyń aıtýynsha, qazirgi kúni arnaıy jumys toby «Nur Otan» partııasynyń 2030 jylǵa deıingi «Baqýatty qoǵam: onjyldyqtyń 10 maqsaty» jáne 2025 jylǵa deıingi Sybaılas jemqorlyqqa qarsy is-qımyl baǵdarlamalaryn qaıta qaraýǵa kiristi.