Partııalyq emes baıqaý ortalyǵynyń 22 myńnan astam baıqaýshysy saılaýǵa qatysady
Baıqaýshylardyń basty mindeti – saılaý kezinde azamattardyń óz erkin bildirý bostandyǵynyń buzylýyna jol bermeý.
«Elimizdiń barlyq óńirinde 22 myńnan astam adamdy qamtıtyn baıqaýshylar pýlyn qurdyq. Ortalyq pen aımaqtyq fılıaldar baıqaýshylardy tolyq qamtyǵan 300-ge jýyq oqý is-sharalaryn ótkizdi. Oqý protsesinde saılaý zańnamasynyń negizderine erekshe kóńil bólinedi. Baıqaýshylardyń quqyqtary men mindetteri qarastyrylyp, saılaý ýchaskelerinde bolǵan zań buzýshylyqtardy joıý jáne daýly máselelerdi sheshý sharalary túsindirildi», - dedi Partııalyq emes baqylaý ortalyǵynyń tóraǵasy Tólegen Kúnádilov baspasóz máslıhatynda.
Sondaı-aq, ol ortalyqtyń baıqaýshylary zańnamanyń barlyq talaptarynyń saqtalýyn jáne 19 qarashada tynyshtyq kúnin qadaǵalaıtynyn atap ótti. Bul kúni kez kelgen úgit-nasıhatqa tyıym salynady.
«Búgin saǵat 00.00-de kandıdattardyń úgit-nasıhat jumystary aıaqtalady. Ol óziniń joǵary tıimdiligimen erekshelendi. Saılaý shtabtary qysqa merzimde aýqymdy aqparattyq jumysty qolǵa aldy. Óz kezeginde BAQ barlyq kandıdattarǵa birdeı qoljetimdilikti qamtamasyz etti. Sarapshylardyń aıtýynsha, turǵyndarmen kezdesýler joǵary deńgeıde uıymdastyryldy, el azamattary saılaýǵa qatysýǵa daıyndalǵan. Barlyq úderis zańnamany buzbaı, naqty, úılesimdi ótti», - dedi T. Kúnádilov.
Aıtýynsha, ortalyqpen seriktestikte 141 ÚEU jumys isteıdi, olar baıqaýshylardy daıarlaý men oqytýǵa járdemdesip otyr.
«Barlyq baıqaýshylar ádistemelik materıaldarmen qamtamasyz etilgen, atap aıtqanda, baıqaýshynyń jumys bloknoty ázirlendi, onda saılaý protsesiniń barlyq erekshelikteri eskerilip, buzýshylyqtar týyndaǵan jaǵdaıda baıqaý jáne tirkeý úshin qajetti aqparatpen qamtyldy. Sonymen qatar, baıqaýshylar úshin jadnamalar, saılaý týraly zańnamadan úzindiler, saılaý barysyn baqylaý erejeleri, baıqaýshylardyń mindetteri men jaýapkershiligi jáne basqa da materıaldar daıyndaldy», - dedi T. Kúnádilov.
Sonymen qatar, ol prezıdenttikke kandıdattardyń shtab basshylarymen jáne Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary bıýrosynyń (EQYU/DIAQB) Qazaqstandaǵy saılaýdy baqylaý jónindegi mıssııasynyń halyqaralyq baqylaýshylarymen kezdesýler týraly habarlady.
«Kezdesýlerde biz ortalyqtyń saılaýdy qoǵamdyq baqylaýǵa qatysýynyń maqsattary men mindetterin aıttyq, sondaı-aq azamattardyń erik bostandyǵyn buzýǵa jol bermeý týraly óz ustanymymyzdy bildirdik», - dep naqtylady spıker.
Sonymen qatar, Partııalyq emes baıqaý ortalyǵynyń ókilderi birqatar saılaý ýchaskelerine baryp, olardyń daýys berýge daıyndyǵymen tanysty.
Ortalyq basshysy habarlaǵandaı, 20 qarashada saılaý kúni baıqaýshylar ár ýchaskede onyń ashylýynan bastap, daýystardy sanaý aıaqtalǵanǵa deıin bolady.
Árbir baıqaýshyǵa barlyq alynǵan málimetter men anyqtalǵan buzýshylyqtardy tirkeıtin arnaıy jumys bloknoty berildi.
Baıqaý qorytyndysy boıynsha bloknottar taldaý júrgizý jáne baıqaý barysy týraly anyq qorytyndy aqparatty daıyndaý úshin Ortalyqtyń shtabtaryna beriledi.
Daýys berý kúni boıy baıqaý protsesi men baıqaýshylardyń qyzmetin úılestirý úshin jedel respýblıkalyq jáne óńirlik shtabtar jumys isteıdi.
Baıqaýshylar bergen derekter boıynsha ýchaskelerdegi jaǵdaıdy Partııalyq emes baıqaý ortalyǵy áleýmettik jelilerde jarııalaıdy.
Baqylaý nátıjelerin Ortalyq 21 qarashada jarııalaýdy josparlap otyr.
«Baıqaýshy bolý – eleýli júkteme jáne úlken jaýapkershilik. Elimiz úshin osy jaýapty sátte bizdiń basty maqsatymyz – saılaý barysynda zańdylyqtyń saqtalýyna jáne daýystardy sanaýǵa qoǵamdyq baqylaý júrgizýge atsalysý ekenin eske salǵym keledi», - dep tolyqtyrdy Tólegen Kúnádilov.
