Partııalyq emes baıqaý ortalyǵy prezıdent saılaýynyń barlyq kezeńin baqylaıdy

ASTANA. QazAqparat – Partııalyq emes baıqaý ortalyǵy 20 qarashada óten prezıdent saılaýynda barlyq saılaý ýchaskesine baıqaýshylaryn jibermek. Bul týraly atalǵan ortalyqtyń tóraǵasy Tólegen Kúnádilov aıtty, dep habarlaıdy QazAqparat tilshisi.

«Óńirlerde respýblıkalyq deńgeıde ahýal shtabtaryn qurdyq. Ol jerde barlyq baıqaýshylar pýlyn oqytý is-sharasy júrgizilip jatyr. Qazirgi tańda 80-nen astam onlaın jáne oflaın formatta oqytý júrgizildi. Saılaý naýqanynyń kúrdeli ekenin jaqsy bilemiz. Sondyqtan osy naýqanda tájirıbeli, baıqaýshy retindegi quqyqtary men mindetterin túsinetin adamdarǵa arqa súıeımiz. Bul saılaýdy shynaıy baǵalaýǵa múmkindik beredi», - dedi ol elordada uıymdastyryǵan brıfıng barysynda.

Onyń atap ótýinshe, ótken aptada ortalyq prezıdenttikke kandıdattardyń shtab jetekshilerimen kezdesý uıymdastyrǵan. Onda úgit-nasıhat jumystary kezine qoǵamdyq monıtorıng júrgizý, saılaý kúni barlyq ýchaskede saılaý úrdisterin baqylaý máseleleri boıynsha pikir almasý bolǵan.

«20 qarasha kúni elimizdegi barlyq saılaý ýchaskesine baıqaýshylarymyzdy jiberýge nıetti bolyp otyrmyz», - dedi Tólegen Kúnádilov.

Sondaı-aq ortalyq tóraǵasy prezıdenttik saılaýdy baıqaýǵa keletin TMD, EQYU jáne basqa da halyqaralyq uıymdardyń mıssııa ókilderimen kezdesýler josparlanǵanyn da atap ótti.