Partııalardyń bılik júıesindegi yqpaly da kúsheıe túsedi — Toqaev
ASTANA. KAZINFORM — Baıqaýshylardyń kópshiligi partııalardyń arasynda ashyq báseke bolǵanyn aıtty. Bul týraly QR Quryltaıynyń birinshi sessııasynyń ashylýynda Memleket basshysy Qasym-Jomart Toqaev málim etti.
— Jalpy, bul saılaýdyń máni de, mazmuny da ózgeshe boldy. Sebebi ótken saılaý eń aldymen Qazaqstandaǵy saıası alýandyqtyń jańa sapaly deńgeıge kóterilgenin baıqatty. Partııalar óziniń áleýetin tolyq kórsetti. Óz baǵdarlamasyn jurtshylyqqa jan-jaqty túsindirip, jetkize bildi. Naýqanǵa qatysqan barlyq partııanyń usynystary jurtshylyqtyń nazaryn aýdardy, qoǵamdyq ómirge úlken serpin berdi. Kóptegen baıqaýshylar partııalardyń arasynda ashyq báseke bolǵanyn aıtty. Shyn máninde, ár partııanyń óz baǵdary, ustanymy jáne ıdeologııasy bar. Naýqan barysynda olardyń qoǵamdaǵy róli, saıası júıedegi orny aıqyndala tústi. Muny Quryltaı saılaýynyń negizgi jetistigi dep baǵalaýǵa bolady. Osyndaı oń ózgeristerdiń arqasynda Qazaqstandaǵy saıası-qoǵamdyq mádenıet únemi damyp, jetilip otyrady, — dedi Qasym-Jomart Toqaev.
Osy oraıda Prezıdent bolashaqta partııalardyń bılik júıesindegi yqpaly da kúsheıe túsetinin atap ótti. Ár naýqan saıyn olardyń róli arta bermek.
— Sondyqtan partııalar alǵan baǵyttarynan taımaı, saılaýshylarmen jumysty jalǵastyra berýi kerek. Sonda ǵana saıası uıymdardyń bedeli kúsheıe túsedi. Osy múmkindikti paıdalana otyryp, partııalar usynǵan baǵdarlamalardyń mazmunyna erekshe toqtalǵym keledi. Bul qujattarda tyń ıdeıalar, tıimdi usynystar bar. Onyń bári de aldaǵy jumys barysynda muqııat saralanady, — dedi Memleket basshysy.
Aıta keteıik, búgin Astanada Prezıdenttiń qatysýymen birinshi shaqyrylymdaǵy QR Quryltaıynyń birinshi sessııasy ashyldy.
