«Partııalarda ıdeologııalyq báseke joq. Nege?» - respýblıkalyq basylymdarǵa sholý
***
Elimizde árbir saılaý saıyn saıası partııalardyń elektorat daýysy úshin kúresi kúsheıip kele jatqandaı. Sońǵy kezde qazaqstandyqtardyń saılaý naýqandaryna degen kózqarasy da ózgere bastaǵan syńaıly. Álemde oryn alǵan ózgeristerdi basshylyqqa ala otyryp, «Egemen Qazaqstan» gazeti elimizdegi saıası jaǵdaı týraly kózqaras, ustanymyn bilmek maqsatynda taldamalyq konsaltıngtik úkimettik emes uıym - «Táýekelderdi baǵalaý toptarynyń» dırektory, saıası ǵylymdar kandıdaty Dosym Sátbaevqa birqatar suraq qoıǵan. Basylymnyń barlyq saýaldaryna tuşymdy jaýap bergen ol: «Partııalardy bılik pen qoǵamdy baılanystyrýǵa tıis kópir desek, olar sondaı-aq azamattyq qoǵam qurýdyń mańyzdy tetikteriniń biri bolyp tabylady. Biraq, ókinishtisi sol, Qazaqstandaǵy kóptegen saıası partııalar aıtarlyqtaı elektoraldyq qoldaýy joq qoldan jasalǵan qurylymdar. Olar kóbinese partııadan góri múddeler jónindegi klýbty eske salady», - deıdi. Suhbattyń tolyq nusqasyn «Partııalarda ıdeologııalyq báseke joq. Nege?» degen taqyryptan oqı alasyzdar.
«Burnaǵy kúni elimizge jumys saparymen kelgen Qyrǵyzstan Premer-mınıstri Ómirbek Babanov keshe Úkimet úıinde BAQ ókilderimen brıfıng ótkizdi. Qazaqstan tarapymen kelissózder tabysty bolǵanyna toqtalǵan ol, kezdesýlerde kóterilgen máselelerdiń Qazaqstan Prezıdenti Nursultan Nazarbaevtyń qoldaýyna ıe bolǵanyn aıta kele, Qyrǵyzstan mıgranttaryn Qazaqstanda qaıta tirkeý merziminiń uzartylǵanyn jetkizdi», dep jazady «Egemen Qazaqstan» gazeti búgingi sanyndaǵy «Aǵaıynmen araqatynas arta túsetin bolady» degen taqyryptaǵy maqalasynda. Sonymen qatar Qyrǵyzstannyń Úkimet basshysy: «Qazaqstan Prezıdenti bizdiń eldiń ońtústik óńirin qoldaý maqsatynda Osh qalasynda qazirgi zamanǵy 1 mektep salý týraly sheshim qabyldady. Bizdiń tarapymyzdan jer telimi bólinip, ınfraqurylym jasaqtalatyn bolady», - deıdi.
***
«Alash aınasy» gazetiniń jazýynsha, jumysqa kirisken bir top májilismenniń atqarýshy bılikten sapaly zań jobasyn áýel bastan-aq talap ete bastaǵany belgili. Onyń ishinde memlekettik til mátinine basa nazar aýdarý qajettigin aıtyp, osyny udaıy qaperge ustaýdy eskertkender de bolǵan. Olardan ásirese halyqaralyq qujattardaǵy qazaq tiliniń mártebesine nemquraıly qaramaý kerektigi suralǵan. «Alaıda zań jobalaý jumysyndaǵy oryssha oratyn ádetti aıta-aıta joıylar degenimizben, aýrý bolyp dendegen bul ádet esh qalmaıtynǵa uqsaıdy. Keshe Májiliste osy másele tómengi palatanyń taǵy aldynan shyqty», - dep jazady basylym. Maqala «Memlekettik tildegi mátin nege mandymaıdy?» degen taqyryppen berilgen.
Osy basylymnyń turaqty «Dat!» aıdarynda QR Bas oftalmologi, Qazaq kóz aýrýlary ǵylymı-zertteý ınstıtýtynyń bas dırektory, medıtsına ǵylymynyń doktory Tursyngúl Botabekovamen aradaǵy suhbat «Biz áli de bolsa kóz aýrýlaryna qara kózildiriktiń arǵy jaǵynan qarap otyrmyz» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ǵalym: «Qalaı desek te, kóz aýrýyna nemquraıly qaraýǵa bolmaıdy. Júrekke basa mán beretindeı, kózge de basa nazar aýdarý qajet. Eń soraqysy, kóz aýrýyna kóńil bólmegendigimiz sonshalyq - qazir jasóspirimder turmaq, elimizde jańa týylǵan nárestelerdiń ózi soqyr bolyp týylyp jatyr. Buryn mundaı aýrý túri Qazaqstanda óte sırek kezdesse, qazir jyldan-jylǵa artyp barady», - deıdi.
***
«Memleket basshysy Nursultan Nazarbaev Qazaqstan musylmandary dinı basqarmasynyń tóraǵasy Ábsattar qajy Derbisálini qabyldady», - dep jazady «Kazahstanskaıa pravda» gazeti. Basylymnyń atap ótýinshe, Bas múftı Prezıdentti Qazaqstan musylmandary dinı basqarmasynyń jumysy týraly habardar etti. Kezdesý barysynda eldegi jalpy dinı jaǵdaı men konfessııaaralyq jáne etnosaralyq kelisimdi odan ári tereńdetý máseleleri talqylandy. Sonymen qatar Á.Derbisáli 11 jyl ishinde Qazaqstanda óz mamandarymyzdy daıarlaý qolǵa alynǵanyn atap ótti. Osy ýaqyt aralyǵynda 960 ımam daıyndaldy, 9 medrese ashyldy, ǵylymı-tájirıbelik konferentsııa ótkizildi, kitaptar shyǵaryldy.
