Partııalar jas saıasatkerlerge kóbirek senim arta bastady — Talǵat Qalıev
ASTANA. KAZINFORM — Partııa basshylyǵyna jas saıasatkerler kele bastady. Bul týraly saıasattanýshy Talǵat Qalıev «SAILAÝ-2026: medıa jáne tsıfrlyq platformalar» sarapshylar alańynda aıtty.
Sarapshynyń aıtýynsha, qazirgi saılaý naýqanynyń basty erekshelikteriniń biri — partııalardyń ishki jańarýy. Buǵan saılaý kúniniń aldyn ala jarııalanýy da yqpal etip, saıası uıymdarǵa elektoraldyq dodaǵa tyńǵylyqty daıyndalýǵa múmkindik bergen.
— Qazirgi naýqannyń basty trendi — partııalar quramynyń jańarýy. Kóp saıası uıymda basshylyq birtindep jańa býyn saıasatkerlerine aýysyp jatyr. Bul partııalarǵa jańa ıdeıalar usynýǵa, jaqtastarynyń qataryn keńeıtýge jáne Quryltaıdyń aldaǵy jumysynyń zamanaýı kún tártibin qalyptastyrýǵa múmkindik beredi, — dedi Talǵat Qalıev.
Onyń sózinshe, partııa ishindegi ózgerister jasandy úderis emes, qoǵam suranysyna berilgen zańdy jaýap.
— Búginde azamattar kadrdyń jańarýyn, ashyq saıası básekeni jáne zamanaýı syn-qaterler aldynda saıası kúshterdiń birlesip áreket etýin kútedi, — dedi saıasattanýshy.
Talǵat Qalıevtiń pikirinshe, bul ózgerister Qazaqstannyń partııalyq júıesi birtindep jańa kezeńge ótip jatqanyn kórsetedi. Munda endi saıası tájirıbemen qatar qoǵamnyń jańa suranystaryna jaýap berip, tıimdi sheshimder usyna bilý qabileti de mańyzdy ról atqara bastady.
Eske qalaıyq, Qazaqstannyń strategııalyq zertteýler ınstıtýty (QSZI) alańynda búgin saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylanyp jatyr.
