Partııalar saılaýshylarmen júzdesti: naýqannyń ekinshi kúninde kún tártibi qalaı ózgerdi
ASTANA. KAZINFORM – Naýqannyń ekinshi kúninde partııalar saltanatty rásimderden óńirlerdegi praktıkalyq jumysqa den qoıdy. Eger alǵashqy kúni negizgi oqıǵa saılaýaldy shtabtardyń ashylýy bolsa, endi kandıdattar saılaýshylarmen alǵashqy kezdesýlerin ótkizip, oblystarǵa saparlaryn bastap, kásiporyndar men salalyq alańdardy aralaýǵa kiristi.
Sonymen qatar árbir saıası partııa túrli aýdıtorııalarǵa baǵyttalyp, halyqpen qarym-qatynastyń ózindik formatyn tańdady.
«Ádilet» partııasy úgit-nasıhat naýqanynyń óńirlik kezeńin Túrkistan oblysynan bastady. Kúni boıy kandıdattar zııaly qaýym ókilderimen, pedagogtermen, medıtsına qyzmetkerlerimen, qolónershilermen, sportshylarmen, kásipkerlermen jáne óńir turǵyndarymen birqatar kezdesý ótkizdi. Kezdesýler barysynda ınfraqurylymdy damytý, týrızm, shaǵyn bıznes, aýyldyq aýmaqtardy órkendetý jáne áleýmettik sala máseleleri talqylandy. Sonymen qatar saılaýaldy naýqan aıasynda «Ádiletti Qazaqstan úshin» mobıldi kerýenderi jumysyn bastady.
Jalpyulttyq sotsıal-demokratııalyq partııa (JSDP) Astanada jýrnalısterdiń, saıasattanýshylardyń jáne blogerlerdiń qatysýymen dóńgelek ústel uıymdastyrdy. Іs-shara barysynda saılaýaldy naýqan, partııalyq báseke jáne kadr saıasaty máseleleri talqylandy.
«Baıtaq» jasyldar partııasy naýqanyn Astanada ekologııalyq marafon ótkizý arqyly. jalǵastyrdy. Іs-shara Trıatlon parkinde ótip, oǵan 200-den astam adam qatysty. Olardyń qatarynda Quryltaı depýtattyǵyna kandıdattar, partııa belsendileri, eriktiler men ekobelsendiler boldy. Qatysýshylar 2,5 shaqyrym qashyqtyqty eńsergennen keıin is-sharaǵa qatysýshylarmen kezdesý ótkizdi.
Qazaqstannyń Halyq partııasy (QHP) saılaýaldy naýqanyn Pavlodar oblysynda jalǵastyrdy. Onda kandıdattar ónerkásip kásiporyndarynyń eńbek ujymdarymen kezdesti. Kezdesýler barysynda eńbek jaǵdaılary, áleýmettik sala jáne óndiristik qaýipsizdikke qatysty máseleler talqylandy.
Naýqannyń ekinshi kúni «Aýyl» partııasynyń basshylyǵy AUYL JASTARY jastar qanatynyń úgit-nasıhat is-sharalaryn ótkizý boıynsha daıyndyǵymen tanysty. Bul is-sharalar saılaýaldy kezeńde elimizdiń barlyq óńirinde ótkiziledi dep josparlanǵan. Sonymen qatar Quryltaı depýtattyǵyna kandıdattar Astanadaǵy «StalTsınk» kásipornyna baryp, óndiris jumysymen tanysyp, eńbek ujymymen kezdesti. Kezdesý barysynda óndiristi damytý, kásipkerlik, óńirlik ekonomıka jáne eńbek adamyn qoldaý máseleleri talqylandy. Kún sońynda Quryltaı depýtattyǵyna kandıdat Jıgýlı Daırabaevtyń qatysýymen partııanyń áleýmettik jelidegi resmı paraqshasynda tikeleı efır ótti.
«Aq jol» demokratııalyq partııasynyń ókilderi partııa tóraǵasy Danııa Espaevanyń jetekshiligimen saılaýshylarmen kezdesýlerin jalǵastyrdy. Kezdesýler barysynda ekonomıkalyq saıasat, kásipkerlikti qoldaý jáne qatysýshylardy qyzyqtyrǵan ózge de máseleler talqylandy. Sondaı-aq saılaýaldy naýqanyn ótkizýge qatysty birqatar máseleler boıynsha pikir almasý boldy.
Respublica partııasynyń ókilderi óńirlik saparlaryn Qaraǵandy oblysynan bastady. Delegatsııa birneshe aýyl sharýashylyǵy kásipornyna baryp, sharýashylyq basshylarymen jáne agrarlyq sektor qyzmetkerlerimen kezdesti. Kezdesý barysynda aýyl sharýashylyǵyn damytý jáne saladaǵy qoldanystaǵy retteý máseleleri talqylandy.
Jalpy, saılaýaldy naýqannyń ekinshi kúni resmı bastalý kezeńinen saılaýshylarmen praktıkalyq jumys kezeńine kóshkenin kórsetti. Saıası partııalar óńirlik kún tártibine, eńbek ujymdarymen, kásipkerlermen, jastarmen jáne qoǵam ókilderimen kezdesýler ótkizýge, sondaı-aq taqyryptyq qoǵamdyq is-sharalar men ashyq pikirtalastar uıymdastyrýǵa basymdyq berdi.
Aıta ketelik Quryltaı saılaýy: 7 saıası partııa saılaýaldy shtabtaryn ashqan edi.
