Partııalar saılaýshylarmen júzdesti: mektepterde jáne óndiris oryndarynda ózekti máseleler talqylandy
ASTANA. KAZINFORM – Partııalardyń ókilderi mektepterde, aýrýhanalarda, zaýyttarda jáne arhıvterde saılaýshylarmen kezdesip, ár salanyń ózekti máselelerin talqylady.
«Ádilet» partııasynyń ókilderi Aqmola oblysynyń turǵyndarymen kezdesti. Partııanyń respýblıkalyq saılaýaldy shtaby uıymdastyrǵan kezdesýde kókshetaýlyqtar óńir úshin mańyzdy bastamalardy usyndy. Olardyń qatarynda kásipkerlerge arnalǵan biryńǵaı tsıfrlyq platformany iske qosý, kommýnaldyq jelilerdi jańǵyrtý jáne jańa jumys oryndaryn qurý bar.
Jalpyulttyq sotsıal-demokratııalyq partııasy (JSDP) eldiń bolashaǵy bilim berý júıesine baılanysty dep eseptep, osy taqyrypqa arnalǵan arnaıy konferentsııa ótkizdi. Depýtattyqqa kandıdattar, pedagogter men sarapshylar bilim sapasy, kadr tapshylyǵy, mektep ınfraqurylymynyń jaı-kúıi jáne muǵalimderdi qoldaý máselelerin talqylady.
Respublica partııasynyń ókilderi bilim men ǵylym salasyna ekpin qoıyp otyr. Partııa muǵalimderdi jazalaýdyń ornyna bilim berý ortasyn damytý men pedagogterdi qoldaýdy quptaıdy. Sondaı-aq partııa Jezqazǵanda óz jaqtastarynyń forýmyn ótkizip, onda óńirdiń ónerkásibi, joldarynyń jaǵdaıy, medıtsınasy jáne bilim berý salasy talqylandy.
«Baıtaq» partııasy úshin ekologııa máselesi densaýlyq saqtaý salasymen tyǵyz baılanysty. Keshe bul ustanym is júzinde kórinis tapty. Osy oraıda kandıdat Aqtaýdaǵy №2 qalalyq emhananyń ujymymen kezdesti. Kezdesý barysynda medıtsına salasynyń jaı-kúıi, óńirdiń ekologııalyq qaýipsizdigi jáne patsıentterdi áleýmettik qorǵaý máseleleri talqylandy.
Qazaqstan Halyq partııasy keshe tarıhı jady taqyrybyna erekshe nazar aýdardy. Partııa izdestirý jumystaryn, arhıvtik zertteýlerdi jáne patrıottyq jobalardy qoldaý maqsatynda «Memorıaldyq aımaq» birlestigimen yntymaqtastyq týraly memorandýmǵa qol qoıdy. QHP bul bastamany ata-baba erligine taǵzym etýdiń mańyzdy bóligi dep esepteıdi.
Keshe Qostanaı oblysyna «Aýyl» partııasynyń tóraǵasy Qaırat Aıtýǵanov bastaǵan delegatsııa bardy. Ol eńbek ujymdarymen, partııa belsendilerimen jáne aýyl turǵyndarymen kezdesip, agroónerkásip keshenin damytý, kásipkerlikti qoldaý jáne ınfraqurylymdy jańartý máselelerin talqylady.Sapar jastar volonterlerimen birge ótken úgit-nasıhat aktsııasymen aıaqtaldy.
Sonymen qatar Qaraǵandyǵa «Aq jol» partııasynyń tóraǵasy Dánııa Espaeva bardy. «Seven Refractories Asia» JShS ujymymen kezdesýde otandyq óndirýshilerdi qoldaý, jańa jumys oryndaryn ashý, salyq saıasaty jáne ónerkásipti damytý máseleleri sóz boldy. Buǵan deıingi kezdesýlerde de partııa ókilderi ekonomıkalyq saıasatqa erekshe ekpin qoıdy.
