Partııalar Májiliske usynǵan árbir ókiline 342 myń teńge jarna tóleýi tıis

ASTANA. QazAqparat - Saıası partııalar QR Parlament Májilisine usynǵan partııalyq tizimdegi árbir tulǵaǵa 342 myń teńgeden astam saılaý jarnasyn tóleýi tıis. Bul týraly búgin Ortalyq saılaý komıssııasy tóraǵasynyń orynbasary Vladımır Foos málim etti.

«Zańǵa sáıkes, saıası partııalar Parlament Májilisine usynǵan árbir partııalyq tizimdegi tulǵaǵa 15 eń tómengi jalaqy kóleminde jarna tóleýi tıis. Ol shamamen 342 myń 885 teńgeni quraıdy. Máslıxat depýtattyǵyna úmitkerdiń saılaý jarnasy 5 eń tómengi jalaqy kóleminde. Bul 114 myń 295 teńge», - dedi ol búgin Ortalyq kommýnıkatsııalar qyzmetinde ótken baspasóz máslıxatynda.

Jalpy Parlament Májilisine 107 depýtat saılanady. Onyń ishinde 98 depýtat partııalyq tizim boıynsha, 9-y Qazaqstan xalqy Assambleıasy atynan saılanbaq. Al jergilikti máslıxatqa 3 335 depýtat saılanady. Onyń ishinde oblystyq máslıxattarǵa - 550, qalalyq - 625, sondaı-aq 2160 depýtat aýdandyq deńgeılerde saılanady.

Aıta keteıik, QR Parlament Májilisiniń jáne máslıxat depýtattaryn saılaý 20 naýryzǵa, QHA atynan usynylatyn depýtattardyń saılaýy 21 naýryzǵa belgilendi.