Partııalar aýyl ákimin saılaý kezinde kandıdattyń laıyqtylyǵyna jaýapty bolýy kerek — Jazyqbaı
ASTANA. KAZINFORM — Búgin elordadaǵy «Kongress ortalyǵy» ǵımaratynda Memleket basshy Qasym-Jomart Toqaevtyń qatysýymen «Aýyldyq ákimderdiń dıalog alańy» respýblıkalyq forýmy ótti. Іs-shara aıasynda Memlekettik qyzmet isteri agenttigi «Klıentke baǵdarlanǵan servıstik memlekettik qyzmet: dıalog, kásibılik, ashyqtyq» taqyrybynda arnaıy paneldik sessııa uymdastyrdy.
Jergilikti deńgeıde memlekettik basqarýdyń sapasyn arttyrýdyń túıtkildi máselelerin talqylaýdy maqsat tutqan is-sharany agenttik tóraǵasy Darhan Jazyqbaı júrgizdi. Ol Memleket basshysynyń bastamasymen aýyl ákimderin tikeleı saılaýdyń engizilýi azamattardyń el damýyna yqpal etetin mańyzdy sheshimder qabyldaýǵa at salysý múmkindigin arttyrǵanyn atap ótti.
Aıta ketý kerek, elimizde 2021 jyly alǵash ret aýyl ákimderin tikeleı saılaý ótkizilgen bolatyn. 2023 jyldan beri aýdan jáne oblystyq mańyzy bar qala ákimderin pılottyq rejımde saılaý júrgizilip, bıyldan bul tájirıbe búkil respýblıka boıynsha keńinen engizildi. Osyǵan baılanysty memlekettik qyzmetshilerdiń qoldanystaǵy saıası jáne ákimshilik memlekettik qyzmetshiler sanatyna endi úshinshi — saılanbaly memlekettik qyzmetshiler sanaty qosylady.
Osy oraıda olarǵa qoıylatyn talaptar da ózgeredi. Qyzmetke qabyldaý, ony ótkerý jáne toqtatý tártibi jańa mazmunmen tolyqtyrylady. Saılanǵan ákimder endi óz ókilettigi kezeńinde saılaýaldy baǵdarlamalarynda kórsetilgen maqsattar men mindetterdiń oryndalýy boıynsha tikeleı halyq aldynda jaýapty bolady.
— Jergilikti ákimderdiń kásibı daıarlyǵy men biliktiligi, laýazymdyq mindetin atqarýdaǵy jaýapkershiligi memlekettik apparat qyzmetiniń tıimdiligin anyqtaıtyn faktorlardyń biri. Sondyqtan aýyl ákimderin saılaý kezinde saıası partııalar ózderi usynatyn kandıdattardyń tulǵalyq jaýapkershiligi men kásibı daıarlyǵyna basa nazar aýdaryp, olardyń bolashaqta ákim bolýǵa laıyqtylyǵy úshin jaýaptylyqty ózderine ala bilýi kerek. Agenttik óz tarapynan ákimderdiń kásibı biliktiligin arttyrý jumystaryn turaqty úılestirýge qashan da daıyn, — dedi agenttik tóraǵasy.
Memleket basshysynyń aýyl ákimderiniń kásibı daıarlyǵyn kúsheıtý týraly tapsyrmasyn oryndaý maqsatynda agenttik Memlekettik basqarý akademııasy jáne «Amanat» partııasymen birlesip, keshendi qaıta daıarlaý baǵdarlamasyn ázirledi. Bul baǵdarlama tek oqytýǵa ǵana emes, aýyldy basqarýdyń jańa mádenıetin qalyptastyrýǵa baǵyttalǵan. Búgingi tańda 1800-den astam aýyl ákimi oqytýdan ótti.
Óńirlerde kadr tapshylyǵy máselesin sheshý maqsatynda 2023 jyldan bastap memlekettik tapsyrys negizinde oqýdy joǵary kórsetkishpen (GPA 3,33) aıaqtaǵan túlekterdi memlekettik qyzmetke konkýrssyz qabyldaý júıesi engizildi. Nátıjesinde, bul tetik aýyldyq jáne aýdandyq deńgeıdegi kadr tapshylyǵyn azaıtýǵa naqty yqpal etip, búgingi tańda 732 jas maman konkýrssyz jergilikti deńgeıdegi laýazymdarǵa ornalasty.
Agenttik tóraǵasy basshylyq laýazymdaǵy qyzmetkerler úshin strategııalyq oılaı alý men tsıfrlyq sheshimderdi meńgerýdiń, qoǵammen tıimdi dıalog júrgize bilýdiń erekshe mańyzdylyǵyn atap ótti.
Іs-shara aıasynda jergilikti basqarýdyń tıimdiligi, jańa kadrlyq saıasat, memlekettik apparattyń servıstik jáne klıentke baǵdarlanǵan jańa úlgisine qatysty máseleler jan-jaqty talqylandy.