Partııaaralyq teledebattar respýblıkalyq telearnalar efırinde ótedi
ASTANA. KAZINFORM — Quryltaı depýtattaryn saılaý jónindegi saılaýaldy naýqan aıasynda respýblıkalyq telearnalardyń efırinde partııaaralyq teledebattar ótedi. Bul týraly búgin Ortalyq saılaý komıssııasynyń otyrysynda málim boldy.
Ortalyq saılaý komıssııasynyń múshesi Lázzat Súıindiktiń aıtýynsha, «Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes, buqaralyq aqparat quraldary belgilengen talaptardy saqtaı otyryp, debattar ótkizý úshin óz alańdaryn usynýǵa quqyly.
— Buqaralyq aqparat quraldary men onlaın-platformalardy paıdalanýshylar saılaýaldy úgit-nasıhat kezeńi bastalǵanǵa deıin, ıaǵnı 2026 jylǵy 18 shildege deıin, shart negizinde úgit materıaldaryn ornalastyrýdyń quny men talaptary týraly málimetterdi jarııalap, olardy Ortalyq saılaý komıssııasyna usynýǵa mindetti, — dep atap ótti ol.
Sonymen qatar partııalyq tizimderin usynǵan saıası partııalar teleefırlerge, sonyń ishinde teledebattarǵa qatysýǵa baılanysty shyǵyndardy ózderiniń saılaý qorlarynyń qarajaty esebinen tóleı alady.
Lázzat Súıindiktiń aıtýynsha, qazirgi ýaqytta Ortalyq saılaý komıssııasy «24KZ» telearnasynda partııaaralyq teledebattardy uıymdastyrý máselesin pysyqtap jatyr.
Budan bólek, Ortalyq saılaý komıssııasyna buqaralyq aqparat quraldarynan kelip túsken ótinimderge sáıkes, teledebattardy Qazaqstan, «7 arna» jáne Jibek Joly telearnalarynyń efırinde ótkizý de josparlanyp otyr.
Aıta keteıik, Quryltaı depýtattarynyń mandattaryna qansha úmitker tirkelgenin jazǵanbyz.
