Parsy Shyǵanaǵy elderi Sahır deklaratsııasyn qabyldady

ASTANA. KAZINFORM – Parsy shyǵanaǵy arab memleketteri yntymaqtastyǵy keńesiniń basshylary Keńestiń qaýipsizdigi men turaqtylyǵy bólinbeıtinin, al oǵan múshe memleketterdiń egemendiginiń buzylýy búkil uıymnyń ujymdyq qaýipsizdigine qaýip tóndiretinin atap ótti. Bul týraly Al-Arabiya jazdy, dep habarlaıdy Kazinform menshikti tilshisi.

Parsy shyǵanaǵy arab memleketteri yntymaqtastyq keńesine múshe el basshylary Joǵarǵy keńesiniń 46-shy sessııasy Manamada Bahreın Koroldiginiń patshasy, Mártebeli korol Hamad bın Isa Ál-Halıfanyń tóraǵalyǵymen ótti. 

Sessııa barysynda basshylar Keńes quramyndaǵy memleketter jáne aımaqtaǵy basqa elderdiń egemendigin qurmetteýdiń, olardyń ishki isterine kez kelgen aralasýdy jáne kúsh qoldanýdy (nemese kúsh qoldaný qaýpin) qabyldamaýdyń mańyzdylyǵyn atap ótti.

Sessııa qorytyndysy boıynsha qabyldanǵan Sahır deklaratsııasynda aımaqtyq qaýipsizdikti qoldaý jáne dostas eldermen, halyqaralyq uıymdarmen jáne ekonomıkalyq bloktarmen saıası, ekonomıkalyq jáne áskerı seriktestikti tereńdetý úshin halyqaralyq yntymaqtastyqty nyǵaıtý qajettiligi atap ótilgen.

Parsy shyǵanaǵy yntymaqtastyq keńesiniń kóshbasshylary Sharm-el-Sheıhtegi beıbitshilik sammıtiniń nátıjelerin quptap, Gaza sektoryndaǵy soǵysty toqtatý týraly kelisimniń tolyq saqtalýyn qamtamasyz etý boıynsha aımaqtyq jáne halyqaralyq kúsh-jigerdi qoldaıtynyn bildirdi. Kóshbasshylar gýmanıtarlyq kómek, qalpyna keltirý jumystary jáne táýelsiz, egemen Palestına memleketin qurýǵa baǵyttalǵan barlyq bastamalar qajettiligin atap ótti.

Parsy shyǵanaǵy arab memleketteri yntymaqtastyǵy keńesi – Bahreın, Qatar, Kýveıt, BAÁ, Oman jáne Saýd Arabııasyn qamtıtyn aımaqtyq uıym.

Osyǵan deıin arab memleketteri HAMAS-tan qarýsyzdanýdy jáne bılikten bas tartýdy talap etken bolatyn.