Parsy shyǵanaǵy elderi men Úndistan erkin saýda kelisimi boıynsha kelissózderdi bastady

ASTANA. KAZINFORM — Parsy shyǵanaǵy arab memleketteriniń yntymaqtastyq keńesi (PShAMYK) elderi men Úndistan saýda jáne ınvestıtsııalyq baılanystardy tereńdetýge nıetti, dep habarlaıdy Kazinform tilshisi.

Parsy shyǵanaǵy arab memleketteriniń yntymaqtastyq keńesiniń bas hatshysy Jasem Ál-Býdaıvı men Úndistannyń saýda jáne ónerkásip mınıstri Pııýsh Goıal erkin saýda týraly kelisim boıynsha kelissózderdi resmı túrde bastaý jónindegi birlesken málimdemege qol qoıdy. Qol qoıý rásimi Nıý-Delı qalasynda ótti.

Ál-Býdaıvıdiń aıtýynsha, kelissózderdiń bastalýy jáne birlesken málimdemege qol qoıylýy strategııalyq áriptestiktiń jańa kezeńin bildiredi jáne tyǵyz yntymaqtastyq pen saýda-ekonomıkalyq baılanystardy nyǵaıtýǵa baǵyttalǵan.

Ol kelissózder jan-jaqty ári aýqymdy kelisimge alyp keledi degen úmit bildirdi. Bul kelisim tarıftik jáne tarıftik emes kedergilerdi joıyp, ekijaqty sapaly ınvestıtsııalar aǵynyn arttyryp, ózara tıimdi saýda jáne ınvestıtsııalyq yntymaqtastyqty odan ári yryqtandyrýǵa yqpal etpek.

The Times of India basylymynyń málimetinshe, Parsy shyǵanaǵy arab memleketteriniń yntymaqtastyq keńesi elderi Úndistannyń eń iri saýda seriktesteri sanalady. 2024–2025 jyldary saýda kólemi 178,56 mlrd AQSh dollaryn qurady. Sońǵy bes jylda bul kórsetkish jyl saıyn orta eseppen 15,3%-ǵa ósip otyrǵan.

Úndistan Parsy shyǵanaǵy arab memleketteriniń yntymaqtastyq keńesi elderine mashına jasaý ónimderin, toqyma buıymdaryn, kúrish, jabdyqtar, asyl tastar men zergerlik buıymdar eksporttaıdy. Al kerisinshe, munaı, gaz, munaı-hımııa ónimderi men asyl metaldardy ımporttaıdy.

Buǵan deıin Parsy shyǵanaǵy arab memleketteriniń yntymaqtastyq keńesi elderiniń bas hatshysy NATO bas hatshysynyń arnaıy ókilimen yntymaqtastyq máselelerin talqylaǵan bolatyn.