Parom tarıfi 40 paıyzǵa ósken: Pavlodarda monopolıske qatysty tekseris bastaldy
PAVLODAR. KAZINFORM - Jergilikti turǵyndar Ertis ózeninen ótkizetin paromdaǵy qyzmet baǵasynyń qymbattap ketkenine shaǵymdanǵan. Básekelestikti qorǵaý jáne damytý agenttiginiń óńirlik departamenti tergeý-tekserý sharalaryn bastady.
Pavlodar oblysy Ertis aýdanyndaǵy jalǵyz paromnyń qyzmet quny qymbattap ketkeni jergilikti jurtty alańdatyp otyr. Parommen tasymaldaý baǵasy 20-dan 40 %-ǵa deıin ósken. Keıbir tarıfter 5 myńnan 8 myń teńgege deıin artqan.
Kópshiliktiń shaǵymynan keıin Básekelestikti qorǵaý jáne damytý agenttiginiń Pavlodar oblysy boıynsha departamenti tekserý jumystaryn qolǵa aldy.
- Qazirgi ýaqytta baǵanyń negizdi nemese negizsiz ekenin anyqtaý maqsatynda tergeý-tekserý júrgizilip jatyr. Zań buzýshylyq ázirshe dáleldengen joq, sondyqtan túpkilikti qorytyndy jasaýǵa erte, – deıdi departament basshysynyń orynbasary Álııa Tursynbaeva.
Ótkeldegi tarıfter kólik túrine (jolaýshylar, jeńil avtokólikter, aýyl sharýashylyǵy tehnıkasy) qaraı saralanady. Bıyl jeńil kólikter de birneshe sanatqa bólinip, djıpter men krossoverlerge bólek baǵa engizilgen.
Mamandar atalǵan ótkeldi monopolııalyq sıpattaǵy nysan retinde qarastyrady, sebebi bul ýchaskede Ertis ózeniniń ústinen ótýdiń ózge balamasy joq. Tergeý-tekserý jumystary úsh aıǵa deıin sozylady, qajettilik týyndasa merzimi uzartylýy múmkin. Zań buzýshylyq anyqtalǵan jaǵdaıda is sot tártibimen qaralyp, tarıfterdi burynǵy deńgeıine qaıtarý nemese tómendetý týraly sheshim qabyldanady.
Eske sala keteıik, Pavlodarda monopolıst ártúrli tarıfterdi qoldanyp, zań buzǵan.
