Parolderdi oqıdy: Qazaqstanda hakerlik baǵdarlama tarap jatyr

ASTANA. QazAqparat – Memlekettik tehnıkalyq qyzmet ókilderi hakerlerdiń «Trojan Downloader» vırýsyn taratatyn fıshıngilik ınternet-resýrsyn anyqtady. Bul týraly organ mamandary resmı saıttarynda habarlady, dep habarlaıdy QazAqparat tilshisi.

«Memlekettik qyzmetterdi alýǵa tapsyrys bergen kezde elektrondy qoltańba qaldyrý úshin NCALayer baǵdarlamasyn ornatý qajettigin bárimiz bilemiz. Memlekettik tehnıkalyq qyzmet «hxxps://ncalayer.info/update.php» deıtin fıshıngtik ınternet-resýrsty anyqtady. NCALayer-di jańartatyn baǵdarlama retinde usynylatyn resýrs júktelgen soń «Trojan Downloader» vırýsyn taratady. Sol arqyly qoldanýshynyń qurylǵysyna zııankes baǵdarlama ornatylady.

Sonyń saldarynan aqyrynda qaskóıler pernetaqtada terilgen aqparatty, parolderdi oqı alady. Tipti qurylǵyǵa tysqary qosymshalar da ornata alady», - dep jazylǵan resmı málimette.

Memlekettik tehnıkalyq qyzmet ókilderi mundaı baǵdarlamalardy ornatýdan, kúdikti siltemelerge ótýden aýlaq bolý qajettigin aıtyp otyr. Óıtkeni mundaı áreket jeke málimetterge qaýip tóndirýi múmkin.