Parnıktik gazdar shyǵaryndysyna kvotalardy engizý tarıfterge áser etedi - Orazalınov
ASTANA. QazAqparat - Parnıktik gazdar shyǵaryndysyna kvotalardy engizý nátıjesinde jylý men elektr energııasy tarıfteri ósýi múmkin. Bul týraly búgin Parlament Májilisindegi «Ornyqty damý jáne Parıj kelisiminiń maqsattyryn iske asyrýdy zańnamalyq qamtamasyz etý» taqyrybyndaǵy konferentsııada Qazaqstan elektr energetıkalyq qaýymdastyǵynyń tóraǵasy Shaımerden Orazalınov málim etti, dep habarlaıdy QazAqparat.
«Qazaqstan boıynsha parnıktik gazdar shyǵaryndysynyń 86 paıyzy kómir generatsııasyna tıesili. Osy máselede kómir generatsııasy shyǵaryndylar turǵysynda ekonomıkanyń ózge sektorlarymen básekelespeıdi. Kvotalardy satýdy engizýge qatysty biz boljamdy esepteýlerdi jasadyq, osy rette barlyq kómir generatsııalarynda kvota jetispeıdi. Eger kvotalarmen saýdany engizse, olar kvotany bırjada satyp alýy tıis. Bul turǵyda biz eń tómengi naryqtyq baǵamen esepteýler jasadyq, eger de stansalar ózderiniń jetispeıtin kvotalaryn satyp alatyn bolsa, onda eń kishkentaı stansa jylyna 100 mln. teńge tóleýi tıis. Kómir stansasynyń qýatyna qaraı osy kórsetkish jylyna 686 mıllıonǵa deıin jetedi. Árıne, stansalar ony satyp alýǵa qaýqarsyz. Budan aıyppul sanktsııalary týyndaıdy. 9 stansaǵa jetispeıtin kvotalardy satyp alý úshin qajettilik ortasha alǵanda 3 mlrd. teńgeni quraıdy. Eger satyp almasa, onda aıyppul túrinde jaýapkershilik bolady. Jalpy alǵanda, osy ortasha stansalar úshin qajettilik 27 mlrd. teńgeni qamtyp otyr»,-dedi Orazalınov.
Osy oraıda ol kómir elektr stansalaryna salynǵan aıyppuldar tarıfterge aıtarlyqtaı yqpal etetinin atap ótti. Degenmen de, parnıktik gazdar shyǵaryndysyn tómendetýdi qarastyratyn Parıj kelisimin orynda kerek bolady.
Budan bólek, ol 2030 jylǵa deıin kómir generatsııasy belsendi paıdalanylatynyn jetkizdi.
Sh. Orazalınovtyń aıtýynsha, Atom elektr stansasy jergilikti jerde elektr energııasymen qamtasyz etý problemasyn sheshýge septigin tıgizedi, bul turǵyda Qazaqstannyń biryńǵaı energııa júıesimen baılanyspaǵan batys óńirlerdi turaqty qamtamasyz ete alady.
