Parnıktik gazdar kvotasynan asyp ketkenderge aıyppul mólsheri 2-esege deıin azaıtylmaq
ASTANA. QazAqparat - Parnıktik gazdar kvotasynan asyp ketkenderge aıyppul mólsheri azaıtylmaq. Bul týraly búgin Parlament Senatynyń jalpy otyrysynda Qorshaǵan orta jáne sý resýrstary mınıstri Nurlan Qapparov málim etti.
Jalpy otyrysta «Qazaqstan Respýblıkasynyń Ákimshilik quqyq buzýshylyq týraly kodeksine ózgeris engizý týraly» QR Zańy qabyldanǵan bolatyn.
Zańda qarastyrylǵan ózgerister negizinen parnıktik gazdar shyǵaryndylaryna belgilengen kvotalar kóleminen asyp ketkeni úshin ákimshilik jaýaptylyqty aýystyrýǵa baǵyttalady. Bul negizinen aıyppul mólsherin azaıtý men jaýaptylyqtyń bastalý merzimin ózgertýdi kózdeıdi.
«Qazaqstan parnıktik gazdar shyǵaryndylary úshin kvota saýdalary júıesi arqyly ekonomıkalyq jáne naryqtyq retteýdi júzege asyryp keledi. Bul rette ulttyq zańnamamyzǵa sáıkes, jobalardy iske asyrý nátıjesinde alynǵan kómirtegi birlikterimen ótelmegen, belgilengen kólemnen asatyn kvotanyń árbir birligi úshin 10 aılyq eseptik kórsetkish mólsherinde aıyppul salý kózdelgen. Al tabıǵatty paıdalanýshy kvotany satýǵa jáne ınvestıtsııa tartýǵa quqyly. Osy rette 2013 jyly engizilgen aıyppul salýlardy erterek dep sanaımyz. Óıtkeni, qazaqstandyq kásiporyndar kvotany saýdalaýǵa daıyn emes bolyp shyqty», - deıdi Qorshaǵan orta jáne sý resýrstary mınıstri Nurlan Qapparov.
Osyǵan oraı, Qazaqstannyń údemeli ındýstrııalyq-ınnovatsııalyq damý baǵdarlamasy sheńberinde kásiporyndardyń básekege qabilettiligin arttyrý maqsatynda parnıktik gazdar shyǵaryndylaryna kvotadan asyp túskeni úshin aıyppul mólsherin 10 aılyq eseptik kórsetkishten 5 AEK-ke deıin tómendetý usynylady.
«Bul shamamen 37 eýrony quraıdy. Biz kvotamen belgilengen kólemnen asyp ketken árbir tonna úshin belgilengen aıyppuldyń osy mólsherin ońtaıly sanaımyz», - deıdi N. Qapparov.
