Parnıkti gaz shyǵaryndylaryn retteý salasynda birqatar problema týyndaýda - M.Qojyqov

ASTANA. QazAqparat - Parnıkti gaz shyǵaryndylaryn retteý salasynda birqatar problema týyndaýda. Bul týraly búgin «Parnıkti gaz shyǵaryndylaryna beriletin kvotalarmen saýda-sattyq júıesiniń tájirıbelik qoldanylýy» taqyrybynda ótip jatqan 2-shi Halyqaralyq Carbon-KZ forýmynda «Qazaqstan verıfıkatorlary qaýymdastyǵy» QB tóraǵasy M.Qojyqov aıtty.

«Parnıkti gazdar shyǵaryndylaryn baqylaý jáne kvotalardy saýdalaýdyń ulttyq naryqtyq mehanızmin qurý Qazaqstannyń jasyl ekonomıkaǵa kóshýiniń mańyzdy quramdas bóligi sanalatyndyǵy sózsiz. Búgingi tańda respýblıkada parnıkti gazdar shyǵaryndylaryn retteý salasynda zor jumystar atqaryldy. Degenmen buǵan deıin atqarylǵan jumystar kólemi ulttyq úlesteý júıesindegi álsiz tustardy kórsetip berdi. Bul atalǵan júıeni odan ary qalyptastyrý jáne damytý qajettigin kórsetedi», - dedi qoǵamdyq birlestik basshysy.

Máselen, onyń atap ótýinshe, búgingi tańda kómirsýtekterdi retteý mehanızmderin normatıvtik retteý salasynda birqatar problema týyndap otyr. Bul Qazaqstan Respýblıkasynyń qoldanystaǵy Ekologııalyq kodeksiniń normalaryndaǵy birqatar olqylyqtarǵa baılanysty oryn alyp otyrǵan jaıttar.

«Atap aıtqanda, olar: parnıkti gazdar shyǵaryndylaryn esepteýdiń naqty ádistemesiniń bolmaýy, parnıkti gazdar boıynsha esep ázirleýdiń birjaqty erejesiniń joqtyǵy jáne jańadan keńeıtilgen qondyrǵylarǵa kvotalardy qaıta qaraý mehanızminiń jetildirilmeýi», - dedi M.Qojyqov.