Parlamenttik saılaýda daýys berý tolyǵymen avtomattandyrylǵan — Qyrǵyzstan Prezıdenti
BІShKEK. KAZINFORM – Qyrǵyz Respýblıkasynyń Prezıdenti Sadyr Japarov Qyrǵyzstannyń Jogorký Kenesh depýtattaryn saılaýda daýys berdi, dep habarlaıdy Kazinform agenttiginiń menshikti tilshisi.
Daýys berý rásimi aıaqtalǵannan keıin qyrǵyz kóshbasshysy BAQ-qa málimdeme jasady.
— Saılaýda daýys berý protsesi tolyǵymen avtomattandyrylǵan. Burynǵydaı, saılaý nátıjeleriniń burmalanýyna ákelýi múmkin adam faktorynyń aralasýyna jol berilmeıdi. Esterińizde bolsa, buryn saılaý protsesine bıýlletender men basqa da aralasýlar bolǵan. Qazir bul joq jáne bolmaıdy. Sonymen qatar, saılaýshylar Alaı, Alı-Býký, Chatkal nemese At-Bashıge barýdyń ornyna jaqyn mańdaǵy saılaý ýchaskesinde daýys bere alady, — dedi Sadyr Japarov.
Prezıdenttiń aıtýynsha, kelesi saılaýda zamanaýı tehnologııalar da qoldanylady.
— Endi tsıfrlyq tólqujatpen Týndýk qosymshasynda daýys berýge bolady. Protsedýra tolyǵymen avtomattandyrylǵan. Saılaý protsesine eshqandaı aralasý múmkin emes. Másele tek saılaýshylarǵa para berý bolyp qala beredi. Alaıda tıisti organdar mundaı áreketterge jedel den qoıady, - dedi Qyrǵyz kóshbasshysy el azamattaryna.
Aıta keteıik, búgin, 30 qarasha kúni Qyrǵyzstanda Jogorký Keneshke 30 saılaý okrýgi boıynsha kezekten tys parlament saılaýy ótip jatyr. Daýys berý jergilikti ýaqytpen 08:00-de bastalyp, 20:00-ge deıin jalǵasady.
Bıylǵy saılaý majorıtarlyq júıe boıynsha ótip jatyr: ár okrýgten úsh kandıdat parlamentke ótedi.
OSK saılaý zańnamada qarastyrylǵan barlyq rásimderge saı uıymdastyrylǵanyn, onyń ishinde elektrondy sáıkestendirý júıeleriniń qoldanylyp jatqanyn atap ótti. Ýchaskeler jabylǵannan keıin daýystardy sanaý bastalady, aldyn ala nátıje 1 jeltoqsanǵa qaraǵan túni jarııalanýy múmkin.
29 qarashada Qyrǵyzstanda jergilikti ýaqytpen 08:00-de kandıdattardyń saılaýaldy úgit-nasıhaty aıaqtalyp, «tynyshtyq kúni» ótti.
Buǵan deıin habarlanǵandaı, Jogorký Kenesh depýtattaryn kezekten tys saılaýǵa 467 kandıdat tirkelgen, olardyń altaýy keıinirek saılaýǵa qatysýdan bas tartty. Jalpy akkredıttelgen halyqaralyq baqylaýshylar sany – 788 adam.
Eske salaıyq, Qazaqstanda Qyrǵyzstan azamattary úshin Astana (QR-daǵy Qyrǵyzstan Elshiligi), Almaty (QR-daǵy Qyrǵyzstan Bas konsýldyǵy), Atyraý jáne Qaraǵandy qalalarynda saılaý ýchaskeleri ashylǵan edi. Sonymen qatar, 5 qarashada Almaty, Taraz jáne Shymkent qalalarynda qosymsha úsh ýchaske qurylǵan.
Qyrǵyzstan Іshki ister mınıstrliginiń baspasóz hatshysy Sýltan Makılov brıfıng barysynda saılaý protsesi kezinde tirkelgen 256 zańbuzýshylyq týraly habarlama túskenin málimdedi.
Onyń aıtýynsha, 9 derek boıynsha «Daýys satyp alý» babymen qylmystyq is qozǵaldy.
Prezıdent Sadyr Japarovty Jogorký Kenesh saılaýynyń tabysty ótýimen quttyqtady.