Parlamenttik respýblıkaǵa aınalý máselesi kún tártibinde turǵan joq — Prezıdent
ASTANA. KAZINFORM – Qasym-Jomart Toqaev «Beıbitshilik pen quqyqqa negizdelgen bolashaq» atty konstıtýtsııalyq sot tóreliginiń halyqaralyq forýmyna qatysýshylarmen kezdesti. Bul týraly Aqordanyń baspasóz qyzmeti habarlady.
Basqosýǵa Venetsııa komıssııasynyń prezıdenti Kler Bazı Malorı, BAÁ Joǵarǵy federaldyq sotynyń tóraǵasy Muhammed Hamad Muhammed ál Badı ál Zahrı, Afrıka konstıtýtsııalyq ıýrısdıktsııa organdary konferentsııasynyń tóraǵasy Lıýk Malaba, Mońǵolııa Konstıtýtsııalyq sotynyń tóraǵasy Baıasgalan Gýngaa qatysty.
Memleket basshysy elimizge saparmen kelgeni úshin meımandarǵa rızashylyǵyn bildirdi.
— Biz basqa memleketterdiń ozyq konstıtýtsııalyq saıasatymen birge Venetsııa komıssııasynyń sheshýshi rólin jáne onyń úlgili zań tájirıbesin baǵalaımyz. Bul — demokratııa ınstıtýttarynyń damýyn aıqyndaý jáne adam quqyǵyna kepildik berý isindegi basty baǵdarymyz. Bıyl Konstıtýtsııamyzdyń qabyldanǵanyna 30 jyl toldy. Osy oraıda, atalǵan qujattyń jahandyq syn-qaterler kezindegi áleýmettik úılesimdi, turaqtylyq pen qarqyndy damýdy qamtamasyz etetin negizgi qyzmetin atap ótkim keledi, — dedi Prezıdent.
Qasym-Jomart Toqaev elimizde qolǵa alynǵan aýqymdy saıası, ekonomıkalyq jáne konstıtýtsııalyq reformalar jaıynda aıtty. Prezıdent Ata zańǵa engizilgen ózgerister ókildi bılik tarmaǵy men quqyq qorǵaý ınstıtýttarynyń rólin nyǵaıtyp, atqarýshy bıliktiń esep berý mindetin kúsheıtkenin jetkizdi. Qaıta jańǵyrǵan Konstıtýtsııalyq sot ádil sot tóreligine keńinen jol ashty.
Memleket basshysynyń aıtýynsha, Qazaqstanda «Zań jáne tártip» qaǵıdaty iske asyrylyp jatyr. Quqyqbuzýshylyqqa qatysty jaza men jaýapkershilikti qatańdatýmen qatar halyqtyń quqyqtyq mádenıeti birtindep artyp keledi.
Qasym-Jomart Toqaev jıyn qatysýshylaryna jýyrda Qazaqstan halqyna arnaǵan Joldaýynyń mán-mazmuny jaıynda málimet berdi
— Joldaýda bizdiń jańǵyrýǵa, ınnovatsııaǵa, ornyqty damýǵa, ǵalamdyq kún tártibindegi Qazaqstannyń bedelin nyǵaıtýǵa, halyqaralyq yntymaqtastyqtyń jańa múmkindikterin ilgeriletýge qatysty ustanymymyz kórinis tapty. Sheteldik seriktesterimizdiń osy basymdyqtardy aıqyn túsingeni óte mańyzdy dep sanaımyn. Basty maqsat — Qazaqstandy tehnologııalyq turǵydan ozyq elge aınaldyrý. Sondyqtan jasandy ıntellektiniń qoldaný aıasyn keńeıtý jáne jappaı tsıfrlandyrý jańa ulttyq ıdeıaǵa aınalady, — dedi Qasym-Jomart Toqaev.
Budan bólek, Memleket basshysy Parlament júıesinde aldaǵy ýaqytta bolatyn ózgeristerge toqtaldy.
— Ashyǵyn aıtqanda, bul reforma saıası júıemizdiń ınstıtýtsıonaldy bazasyn nyǵaıtýdy kózdeıdi. Parlamenttik respýblıkaǵa aınalý máselesi kún tártibinde turǵan joq. «Kúshti Prezıdent — yqpaldy Parlament — esep beretin Úkimet» qaǵıdaty saqtalady. Jalpyulttyq referendým ótkizý týraly usynys bul tujyrymdamanyń ómirsheńdigin kórsetedi. Elimizdiń bolashaǵyna qatysty sheshimderdi birlesip qabyldaý qajet. Sol sebepti men saıası josparlarymyz týraly aldyn ala aıtamyn. Buǵan deıingi reformalar kezinde de, AES qurylysyna qatysty referendým ótkizgende de osy ustanymnan aınyǵan joqpyz, — dedi Prezıdent.
Venetsııa komıssııasynyń prezıdenti Kler Bazı Malorı Qazaqstan Eýropa Keńesiniń mańyzdy seriktesi retinde túrli konventsııalarǵa belsendi qatysyp, zań ústemdigin arttyrý úshin tıimdi ınstıtýttyq reformalar júrgizip jatqanyn atap ótti.
BAÁ Joǵarǵy federaldyq sotynyń tóraǵasy Muhammed Hamad Muhammed ál Badı ál Zahrı Qazaqstan men Ámirlikter arasyndaǵy strategııalyq yntymaqtastyqqa joǵary baǵa berdi.
Afrıka konstıtýtsııalyq ıýrısdıktsııa organdary konferentsııasynyń tóraǵasy Lıýk Malaba Qazaqstandaǵy qoǵamdyq-saıası ózgeristerdi jiti baqylap otyrǵanyn jetkizdi.
Mońǵolııa Konstıtýtsııalyq sotynyń tóraǵasy Baıasgalan Gýngaa Prezıdent Qasym-Jomart Toqaevtyń byltyr Mońǵolııaǵa jasaǵan sapary eki el arasyndaǵy kópjaqty baılanystarǵa tyń serpin bergenine nazar aýdardy.
Kezdesý sońynda Memleket basshysy Qazaqstannyń sheteldik konstıtýtsııalyq qadaǵalaý organdarymen yntymaqtastyqty jalǵastyrýǵa nıetti ekenin aıtyp, aldaǵy forým jumysyna tabys tiledi.
Aıta ketelik 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady.