Parlamenttik reforma — Ádiletti Qazaqstan qurý jolyndaǵy baıypty baǵdardyń logıkalyq jalǵasy — Áshimbaev
ASTANA. KAZINFORM — Prezıdenttiń bıylǵy Joldaýyn Qazaqstandy jańǵyrtýdyń jańa zamandaǵy keshendi jol kartasy dep qabyldaımyz. Bul týraly Senat tóraǵasy Máýlen Áshimbaev málim etti.
— Prezıdentimiz Qasym-Jomart Kemeluly Toqaevtyń bıylǵy Joldaýynda elimizdiń áleýmettik-ekonomıkalyq damýyndaǵy jasandy ıntellekttiń róline erekshe kóńil bóldi. Osyǵan oraı, mańyzdy strategııalyq baǵyttar boıynsha iske asyrylatyn naqty sharalar aıqyndaldy. Memleket basshysy Qazaqstan úsh jyl ishinde jappaı tsıfrly memleketke aınalýǵa tıis dep naqty maqsat qoıdy. Mundaı qadam Qazaqstannyń barlyq sektordaǵy áleýetin aıtarlyqtaı arttyryp, ekonomıka men áleýmettik salany sapaly jańa deńgeıge shyǵarýǵa jol ashatyn bolady. Kózdegen maqsatqa qol jetkizý úshin Tsıfrlyq kodeksti qysqa merzimde qabyldaý tapsyryldy. Sonymen qatar, Joldaýda ınvestıtsııalyq saıasatqa da erekshe nazar aýdaryldy.
Bul rette ınvestıtsııa tartý júıesin túgel jańǵyrtý mindet etip júktelgen bolatyn. Belgilengen basymdyqtardyń qatarynda Bankter týraly zańdy jyl sońyna deıin qabyldaý mindeti bar, — dedi Máýlen Áshimbaev Senattyń jalpy otyrysynda.
Sonymen qatar, Senat tóraǵasy Memleket basshysy turǵyn úı sharýashylyǵy men qurylys salasyndaǵy basymdyqtardy belgilep bergenin atap ótti. Bul salanyń turaqty damýyna berik zańnamalyq negiz qalaıtyn jańa Qurylys kodeksin de jyl sońyna deıin qabyldaý qajet.
— Jalpy, Joldaýda júktelgen mindetter men maqsattardy iske asyrý úshin tıisti zańnamalyq aktiler ázirlenip, qabyldanady. Palata olardyń ýaqtyly qaralýyn jáne maquldanýyn qamtamasyz etetin bolady. Bıylǵy Joldaýdyń negizgi erekshelikteriniń biri — Memleket basshysynyń parlamenttik reforma júrgizý týraly usynysy ekeni belgili. Bul bastama bolashaqta bir palataly Parlamentke kóshýdi kózdeıdi. Parlamenttik reforma — Prezıdentimizdiń Ádiletti jáne Qýatty Qazaqstan qurý jolyndaǵy baıypty baǵdarynyń logıkalyq jalǵasy ekeni sózsiz. Bul maqsatqa jetý úshin demokratııalyq ınstıtýttar men tetikterdi kúsheıtý qajet ekeni anyq. Prezıdentimiz Qasym-Jomart Kemeluly Toqaev mundaı mańyzdy ózgerister tek ashyq ári jan-jaqty qoǵamdyq talqylaý negizinde iske asyrylatynyn aıtty. Al, qorytyndy sheshim halyqtyń pikirin eskere otyryp, jalpyulttyq referendým arqyly qabyldanbaq. Jalpy, Prezıdentimizdiń bıylǵy Joldaýyn Qazaqstandy jańǵyrtýdyń jańa zamandaǵy keshendi jol kartasy dep qabyldaımyz, — dedi Máýlen Áshimbaev.
Aıta keteıik, 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady.