Parlamenttik baqylaý negizinde zańnamany ózgertýge bolady – Qanatbek Safınov
Búgin elordada «Memlekettik qyzmetshilerdiń tsıfrlyq úkimet aıasynda zańdardyń oryndalýyn parlamenttik baqylaýdyń nysandary men ádisterin konstıtýtsııalyq reformalaý jáne ońtaılandyrý» taqyrybynda dóńgelek ústel ótti.
Іs-sharany Prezıdent Іs basqarmasy janyndaǵy Parlamentarızm ınstıtýty men Astana memlekettik qyzmet haby uıymdastyrdy, dep habarlaıdy Kazinform.
«Konferentsııanyń maqsaty – Qazaqstan Respýblıkasynda júrgizilip jatqan konstıtýtsııalyq reformaǵa qatysty parlamenttik baqylaýdaǵy ózekti máselelerdi talqylaý, «Kúshti Prezıdent», «Yqpaldy Parlament», «Esep beretin Úkimet» saıası júıesiniń formýlasyn bekitý. Sonymen qatar parlamenttik baqylaýdy damytý memlekettik basqarýdy tsıfrlandyrý jónindegi jalpy baǵyttar aıasynda qaralýy tıis», - dedi dóńgelek ústel otyrysyn ashqan Parlamentarızm ınstıtýtynyń dırektory, zań ǵylymdarynyń doktory Qanatbek Safınov.
Onyń aıtýynsha, elde parlamenttik baqylaýdy júrgizbes buryn jalpy Parlamenttiń rólin, saıası júıedegi mańyzdylyǵyn bilý qajet.
«Parlamenttik baqylaý negizinde zańnamany jáne quqyq qoldaný praktıkasyn ózgertýge, usynystar engizýge bolady. Sondaı-aq, oryndaýshylardy emes, basshylardyń jaýapkershiligi týraly máseleni kótere alady. Memlekettik damýdyń búgingi kezeńinde biz qandaı da bir jańa quraldardy oılap tappaýymyz kerek. Kerisinshe áleýeti zor Konstıtýtsııamyzda neǵurlym belsendi jáne tolyq iske asyrýǵa tyrysýymyz kerek dep sanaımyn», - dedi ol.
Halyqaralyq konferentsııa jumysyna Parlament depýtattary, memlekettik organdar, jetekshi ǵylymı uıymdar men joǵary oqý oryndarynyń ókilderi, kórnekti qazaqstandyq jáne Grýzııanyń zańger-ǵalymdary qatysty. Dóńgelek ústel qorytyndysynda sarapshylar parlamenttik baqylaý quraldaryn odan ári jetildirý jáne qabyldanyp jatqan zańdardy oryndaý boıynsha usynystar ázirledi.
Aıta keteıik, Parlamentarızm ınstıtýty Memleket basshysy Qasym-Jomart Toqaevtyń tapsyrmasymen 2020 jyly quryldy. Instıtýt depýtattarǵa zańnamaǵa ózgerister engizýge, jańa normalardy engizýge, zań jobalaryn ázirleýdi jáne qajettilik boıynsha qarjy-ekonomıkalyq esepterdi daıyndaýǵa, sondaı-aq ekonomıkalyq, áleýmettik esepterdi ázirleýge, zańnamalyq bastama quqyǵyn iske asyrýǵa kómektesedi.
