«Parlamenttiń jańarýy ýaqyt talaby» - respýblıkalyq basylymdarǵa sholý
***
Keshe Aqordada Memleket basshysy Nursultan Nazarbaev Premer-Mınıstr Kárim Másimovpen, Parlament Senatynyń tóraǵasy Qaırat Mámımen, Parlament Májilisiniń tóraǵasy Oral Muhamedjanovpen kezdesip, Qazaqstan Respýblıkasy Parlamentiniń májilisin taratý jáne kezekten tys saılaý ótkizý týraly Májilistiń 53 depýtatynyń úndeýi Prezıdenttiń atyna kelip túsýine baılanysty konsýltatsııa ótkizildi. Onda kóterilgen máseleler «Egemen Qazaqstan» basylymynyń búgingi sanynda «Parlamenttiń jańarýy ýaqyt talaby» degentaqyryppen basyldy.
Sondaı-aq atalmysh basylymnyń jazýynsha, on aılyq qorytyndy nátıjesinde ótken jyldyń osy merzimimen salystyrǵanda, ekonomıkanyń mańyzdy degen alty arqaýlyq salasynda damý kórsetkishi 7,2 paıyzdy quraǵan. Sóıtip álemdik ekonomıkanyń jandanýy, eksportqa baǵyttalǵan taýarlar baǵasynyń turaqtylyǵy, el ishindegi suranystyń artýy osyndaı kórsetkishke qol jetkizýge negiz bolǵan. Bul máseleler keshe Premer-Mınıstri Kárim Másimovtiń tóraǵalyǵymen ótken Úkimet otyrysynda málim boldy. Osy otyrysta kóterilgen ózge de máseleler jóninde bilgińiz kelse, «Egemen Qazaqstan» basylymynyń búgingi sanyndaǵy «On aılyq qorytyndy oıdaǵydaı» atty maqalany qarańyz.
***
«Aıqyn» basylymy búgingi sanynda «Tarazdaǵy jazyqsyz jeti adamnyń qazasyna ákelgen qastandyq áreketter Qazaqstanda lańkesti qaýpiniń kúsheıgenin anyqtaıdy»,-dep jazady. Osyǵan qaraı basylym bıyl elde birneshe ret bolǵan lańkestik oqıǵalar osymen támam ba? «Eger qaıtalana qalǵan jaǵdaıda oǵan qarsy turýǵa qanshalyqty daıynbyz»,-degen másele tóńireginde túrli mamandardyń pikirlerin usynǵan. Bul pikirler «Qanshalyqty daıynbyz?» degen taqyryppen berilip otyr.
Sondaı-aq atalmysh basylym búgingi sanynda «Kóshe ataýlary qashan qazaqshalanady», degen taqyryppen maqala jarııalap, kókeıkesti másele kóterdi. Basylymnyń jazýynsha, Táýelsiz otanymyzdyń tarıhyn jańǵyrtyp, jas býyn jadyna ulttyq ıdeıa úshin kúresken jandardyń sarabdal esimderin sińirip, máńgi este saqtaý sharalary nemquraıly jasalýda. Óńirlerdegi jer-sý ataýlarynyń tarıhı qazaqy ataýlaryna qaıta oralýymen qatar, ult pen memlekettiń jolynda aıanbaı eńbek etip, úles qosqan, sol jolda jazyqsyz qurban bolǵan esimderdiń berilýi Qazaqstan Respýblıkasy Táýelsizdiginiń 20 jyldyq mereıtoıy qarsańynda iske asyrylýy kerek is edi, olaı bolmaı shyqty. «El tutqasynda otyrǵan azamattar osy máseleni qalt jiberip alǵanǵa uqsaıdy», - dep jazady «Aıqyn» basylymy.
***
«Alash aınasy» basylymynyń jazýynsha, Kedendik odaqqa baılanysty ótken jıynda syraǵa qandaı mártebe berý jaıly shý shyqqany belgili. Belarýs úkimeti syrany alkogolsiz ónim dep sanaýdy usynǵan bolatyn. Bul - Kedendik odaqta ábden talqylanǵan taqyryp. Móldir sýsyn úshin belarýstyqtar syra ónimderi týraly tehnıkalyq reglament jasaýdy usyndy. Belorýssııada syra naryǵynyń 80 paıyzyn plastık ydystarǵa quıylǵan ónimder quraıdy. Eger syrany alkogoldi ónimder qataryna qossa, belarýstyqtardyń plastıkti shyny ydystarǵa aýystyrýyna týra keledi. Bul kóp shyǵyndy qajet etedi. Reseı de syraǵa qatysty óz ustanymdaryn jumsartpaq nıet tanytty. Bul turǵyda barlyq alkogoldik ónimderdi plastık ydystarda shyǵarýǵa qarsy shyqqan Qazaqstandy Reseı qoldamaı otyr. Bul shýdyń sońy nemen aıaqtalǵanyn «Alash aınasy» basylymynyń búgingi sanyndaǵy «Syra qazaqtyń soryna aınalyp barady» atty maqaladan bilýge bolady.
Sondaı-aq atalmysh basylym búgingi sanynda Parlament Májilisiniń depýtaty, bilikti zańger Ramazan Sárpekovpen bolǵan suhbatty jarııalady. Onda halyq qalaýlysy el Parlamentiniń qalyptasýy men onyń búgingi jetistikteri jóninde baıandaıdy. Depýtattyń pikirinshe, Qazaqstan memlekettiginiń qalyptasýyna Joǵarǵy Keńestiń qosqan úlesi talassyz. «Men bul kezeńdi Táýelsizdik tarıhynyń úlken ári mańyzdy paraǵy retinde qarastyramyn. Odan keıingi jańǵyrý jyldaryndaǵy Parlamenttiń eldik qyzmeti de óz aldyna bir tóbe»,-deıdi depýtat. Bul suhbat «Alash aınasy» basylymynyń búgingi sanynda «Parlament ýaqyt synynan súrinbeı ótti» atty taqyryppen basyldy.
***
Astanada Táýelsizdiktiń 20 jyldyǵyna arnalǵan elimizdiń aımaqtarynyń kúnderi aıaqtaldy. Bul kúnder elorda turǵyndary úshin naǵyz merekege aınaldy dese bolady. Astanada úsh kúnge sozylǵan jármeńke udaıy uıymdastyrylyp otyrdy. Onda qala turǵyndary elimizdiń aımaqtarynyń qoljetimdi baǵamen jetkizilgen sapaly taýarlarynyń qyzyǵyn kórip qana qoımaı, ár aımaq shyǵaratyn ónimder jóninde kóp maǵlumat aldy. Jármeńkeniń kórigin aımaqtaǵy kórkemónerpazdar ujymy daıyndaǵan kontsert qyzdyrdy. Osy mereke barysynda qaı aımaqtyń qaı óndirisi turǵyndardyń erekshe esinde qaldy jáne jármeńkeniń ózge de qyzyqtary jóninde «Kazahstanskaıa pravda» basylymynyń búgingi sanyndaǵy «Parad regıonov» atty maqalada.
