Parlamenttiń reformalary men josparlary Qazaqstan halqynyń ál-aýqatyn arttyrýǵa baǵyttaldy - O.Muhamedjanov
ASTANA. 31 qańtar. QazAqparat /Aıdar Ospanalıev/ - Májilis tóraǵasy Oral Muhamedjanovtyń aıtýynsha, Parlamenttiń osy ýaqytqa deıingi reformalary men josparlary ekonomıkalyq áleýetti nyǵaıtyp, sol arqyly Qazaqstan halqynyń ál-aýqatyn arttyrýǵa baǵyttaldy. Bul týraly tóraǵa búgin elimizdiń Joǵary zań shyǵarýshy organynyń 15 jyldyǵyna arnalǵan saltanatty jınalysta málim etti.
Tóraǵanyń sózine qaraǵanda, Qazaqstan Parlamenti bizdiń tarıhymyzda ózindik orny bar Joǵarǵy Keńesten bastap, elimizdiń ekonomıkalyq órkendeýine, saıası turaqtylyqty, azamattyq beıbitshilik pen ulttyq kelisimdi nyǵaıtý jolyndaǵy qyzmetin baıandy atqaryp kele jatqan qos palataly kásibı Parlamentke deıingi joldan ótti. Búgingi tańda ol jalpyǵa ortaq álemdik parlamentarızm qaǵıdattaryna sáıkes jumys isteıtin zań shyǵarý tájirıbesi tolysqan memlekettik, saıası qurlymnyń mańyzdy bóligine aınaldy.
«Qazaqstan Respýblıkasynyń tuńǵysh Prezıdenti, Elbasy Nursultan Nazarbaev Parlament qyzmetine baǵa bere kele «Búginde bizdiń zańnamalyq fýnktsııalardy júzege asyratyn joǵary ókiletti organ retindegi, kásibı qos palataly Parlamentimiz iske asyp qana qoıǵan joq, sonymen birge ýaqyt synynan oıdaǵydaı ótti dep nyq senimmen aıta alamyz», -dep atap kórsetti. Qazaqstannyń qos palataly Parlamenti qurylǵan kezden bastap, qoǵam ómiriniń barlyq salasyn qamtıtyn 1 myń 800-den astam zańnamalyq akti qabyldady. Olardyń árqaısysy depýtattardyń tyńǵylyqty saraptaýynan ótken Parlamentte de, qoǵamda da tipti syrtqy elde de pikirtalas týdyrǵan shyǵarmashylyq aqyl-oıdyń jemisi bola otyryp, saıası-ekonomıkalyq jáne qoǵamdyq-áleýmettik mańyzǵa ıe boldy»,-dedi O.Muhamedjanov.
Sondaı-aq onyń aıtýynsha, Parlament depýtattary 111 zań jobasyna ózderi bastamashylyq jasap, ázirledi. Olardyń qatarynda halyqtyń kóshi-qony, til, balanyń quqyqtary, saıası partııalar, erler men áıelderdiń teń quqyqtarynyń memlekettik kepildikteri, jemqorlyqqa qarsy saraptaý máseleleri jóninde jáne basqa da kóptegen mańyzdy zańdar bar.
