Parlamenttiń ózinde zańdardy memlekettik tilde qaraýǵa tolyq jete almaı júrmiz - Q. Sultanov
Til tóńiregindegi taqyrypqa toqtalǵan P arlament Májilisiniń depýtaty Qýanysh Sultanov , bul máselede eń aldymen memlekettiń quzyrly organdary úlgi bolýy kerektigin atap ótti. «Elbasy óziniń árbir sózinde memlekettik qyzmetkerlerdiń halyqqa qatysty qyzmet deńgeıin sapalandyrýdy udaıy aıtyp keledi. Bul turǵydan alsaq, memlekettik tilge tek jınalystar júrgizý deńgeıinde ǵana emes, halyqpen baılanysý, qujattardy daıyndaý turǵysynan da mańyzdy. Óıtkeni , biz qazirgi kúni Parlamenttiń ózinde zańdardy memlekettik tilde qaraýǵa tolyq jete almaı júrmiz», - dedi Q. Sultanov.
Sonymen birge, depýtat memleket jumysynda rýhanı dárejeni kóterýge kóptegen sharalar atqaryp jatqanyn, qyrýar qarajattar bólingenin de atap ótti. Onyń paıymynsha, memlekettik tildi damytý, keńinen paıdalaný jaǵymdy kórsetkishke aınalyp barady.
«Orys tili turǵysynan Qazaqstanda eshqandaı qıyndyq ta, másele de joq. Qazaqtardyń basym bóligi «týa sala» oryssha sóılep te jatyr. Shyndyǵynda, orys tili bizdiń rýhanı baılyǵymyz. Osy jaǵynan alsaq, qazaqtar eshqashanda orys tilinen bas tarta almaıdy, olar orys tilin, onyń baılyǵy men múmkindikterin ıgerýdi odan ári jalǵastyra beredi. Buǵan qosymsha aǵylshyn tilin jastarymyz ıgerip jatyr. Buǵan da Prezıdent nazar aýdarǵan bolatyn. Jalpy, adam balasynyń tili - onyń anasynyń tili. Endeshe, ana tilge qurmet kórsete otyryp, qosymsha tilderdi ıgerýge jaǵdaı jasalýy shart», - dedi Q. Sultanov.
«Álemde aǵylshyn tiliniń ústemdigi bolǵandyqtan, odan da bas tarta almaımyz. Bul tildi bilý bizdiń azamattarymyzǵa óz elimizden tysqary jerlerdegi bıik deńgeıge kóterilýine yqpal etedi. Sondyqtan da, bul saıasat durys, odan pikirtalastar jasaı bergenshe, jaǵdaı jasaǵan lázim. Sosyn memlekettik tildiń damýyn tek Úkimetten kútip otyrý da durys emes. Ony kez kelgen adam óziniń sanasymen túısinip, jaýapkershilik alýy kerek. Óziniń ata-anasyna qandaı jaýapkershilikpen qarasa, tilge degen jaýapkershilik týra sondaı bolýy kerek», - dedi ol.
