Parlamenttiń osy aptadaǵy jumys kestesi belgili boldy
ASTANA. QazAqparat - QR Ortalyq kommýnıkatsııalar qyzmetiniń resmı ókili Murat Jumanbaı osy aptadaǵy el Parlamentiniń jumys kestesin jarııa etti, dep habarlaıdy QazAqparat.
«14 naýryzda QR Parlamenti Senatynda Agrarlyq máseleler, tabıǵatty paıdalaný jáne aýyldyq aýmaqtardy damytý, sý resýrstary komıteti sý resýrstaryn, onyń ishinde transshekaralyq ózenderdi paıdalanýǵa baılanysty máselelerdi zańnamalyq retteý taqyrybynda dóńgelek ústel ótkizedi. 15 naýryzda Parlamenttiń joǵary palatasynyń Áleýmettik-mádenı damý jáne ǵylym komıteti halyqty jumyspen qamtý máseleleri boıynsha QR Eńbek jáne halyqty áleýmettik qorǵaý mınıstrliginiń basshylyǵymen jáne basqa da memlekettik organdarmen kezdesý uıymdastyrady. 17 naýryzda Senatta úılestirilgen ári aıqyn bıýdjet eldiń áleýmettik-ekonomıkalyq turaqty jáne jemisti damýynyń kepili taqyrybynda parlamenttik tyńdaý ótedi», - dedi ol búgin dástúrli aptalyq brıfıng barysynda.
Onyń aıtýynsha, 15 naýryzda QR Parlamenti Májilisiniń jalpy otyrysynda depýtattar mádenıet máseleleri jónindegi zańnamalyq túzetýler jobasyn qarastyratyn bolady. Sonymen qatar Májilis depýtattary Serbııamen halyqaralyq avtomobıl qatynasy týraly úkimetaralyq kelisimdi ratıfıkatsııalaý týraly zań jobasyn talqylaıdy.
«16 naýryzda Parlament Májilisiniń agrarlyq máseleler komıtetinde «100 naqty qadam» Ult josparynyń 34-qadamyn iske asyrý aıasynda memleketik-jekemenshik áriptestikti damytý máseleleri atty taqyryptyq otyrys ótkizedi», - dedi Jumanbaı.
