Parlamenttiń altynshy shaqyrylymy alǵashqy sessııany aıaqtap, depýtattar parlamenttik kanıkýlǵa ketti
ASTANA. QazAqparat - Búgin Parlament palatalarynyń birlesken otyrysy ótip, altynshy shaqyrylymnyń alǵashqy sessııasynda atqarylǵan jumystar qorytyndylandy.
Eske sala ketsek, altynshy shaqyrylǵan Parlamenttiń birinshi sessııasy 3 aı nemese 100 kúnnen asa ǵana jumys istedi. Májilis spıkeri Nurlan Nyǵmatýlınniń aıtýynsha, bul ádettegi sessııalardyń úshten bir bóligine ǵana teń.
«Alaıda, osy kezeń ishinde el ómirinde mańyzdy ról atqaratyn qujattar qabyldandy. Atap aıtqanda, osy sessııa barysynda qos palatanyń úsh birlesken otyrysy, Májilistiń 12, Senattyń 6 jalpy otyrysy ótti. Bul kezeńde Májilis qaraýynda 42 zań jobasy boldy. 7 zań jobasyn depýtattarymyzdyń ózderi ázirledi. Osy sessııada Májilis 13 zań jobasyn maquldap, Senat 12 zańdy qabyldady», - dedi N. Nyǵmatýlın.
Onyń aıtýynsha, birinshi sessııa barysynda 3 Úkimet saǵaty, turaqty komıttetterdiń 109 otyrysy, zań jobalary boıynsha jumys toptarynyń 160 otyrysy, 7 «dóńgelek ústel, komıtetterdiń 3 kóshpeli otyrysy ótkizilgen.
Jumysty qorytyndylaǵan Májilis spıkeri depýtattyq korpýstyń aldaǵy zań shyǵarý qyzmetine tabys tiledi.
